ടെക് ഭീമനായ മെറ്റയും റിലയൻസ് ഇൻഡസ്ട്രീസും കൈകോർത്ത് ഗുജറാത്തിലെ ജാംനഗറിൽ ഇന്ത്യയിലെ ആദ്യത്തെ അത്യാധുനിക എ.ഐ (AI) ഡാറ്റാ സെന്റർ സ്ഥാപിക്കുന്നു. ജൂൺ 10 ചൊവ്വാഴ്ച പുറത്തുവിട്ട ഔദ്യോഗിക പ്രഖ്യാപന പ്രകാരം, റിലയൻസ് നിർമ്മിച്ച് നൽകുന്ന 168 മെഗാവാട്ട് ശേഷിയുള്ള ഈ കൂറ്റൻ ഡാറ്റാ സെന്റർ മെറ്റ പൂർണ്ണമായും ലീസിനെടുത്ത് പ്രവർത്തിപ്പിക്കും. ഇന്ത്യയിലെ കോടിക്കണക്കിന് വരുന്ന ഫേസ്ബുക്ക്, ഇൻസ്റ്റാഗ്രാം, വാട്സാപ്പ് ഉപഭോക്താക്കൾക്ക് കൂടുതൽ വേഗതയേറിയ എ.ഐ സേവനങ്ങളും ഫീച്ചറുകളും ലഭ്യമാക്കാൻ ലക്ഷ്യമിട്ടാണ് മെറ്റാ ഈ വലിയ നിക്ഷേപം നടത്തുന്നത്.
ഈ പങ്കാളിത്തം ഇന്ത്യയുടെ ഡിജിറ്റൽ ഇൻഫ്രാസ്ട്രക്ചർ രംഗത്തെ ചരിത്രപരമായ മുന്നേറ്റമാണെന്ന് റിലയൻസ് ചെയർമാൻ മുകേഷ് അംബാനിയും, ആഗോളതലത്തിൽ മെറ്റായുടെ എ.ഐ സാങ്കേതികവിദ്യ വ്യാപിപ്പിക്കുന്നതിൽ ഇതൊരു സുപ്രധാന നാഴികക്കല്ലാണെന്ന് മെറ്റാ സി.ഇ.ഒ മാർക്ക് സക്കർബെർഗും വ്യക്തമാക്കി. ആഗോള ആർട്ടിഫിഷ്യൽ ഇന്റലിജൻസ് മത്സരരംഗത്ത് ഇന്ത്യയുടെ സ്ഥാനം കൂടുതൽ ശക്തമാക്കാൻ ഈ പുതിയ പദ്ധതിക്ക് സാധിക്കുമെന്നാണ് വിലയിരുത്തപ്പെടുന്നത്.
