ന്യൂഡൽഹി: നീറ്റ് ചോദ്യപേപ്പർ ചോർച്ച വിവാദത്തെച്ചൊല്ലി പാർലമെന്റ് കവാടത്തിന് മുന്നിൽ നാടകീയ സംഭവങ്ങളും ഭരണ-പ്രതിപക്ഷ അംഗങ്ങൾ തമ്മിൽ രൂക്ഷമായ വാക്പോരും. ഇരുകൂട്ടരും നേർക്കുനേർ നിന്ന് മുദ്രാവാക്യം വിളിച്ചതോടെ പാർലമെന്റ് വളപ്പിൽ കടുത്ത സംഘർഷാവസ്ഥ ഉടലെടുത്തു.
കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ടാണ് പ്രതിപക്ഷ എം.പിമാർ രാവിലെ പാർലമെന്റ് കവാടത്തിന് മുന്നിൽ പ്രതിഷേധ സമരം ആരംഭിച്ചത്. പ്ലാക്കാർഡുകളേന്തി കേന്ദ്ര സർക്കാരിനും വിദ്യാഭ്യാസ മന്ത്രിക്കുമെതിരെ പ്രതിപക്ഷം മുദ്രാവാക്യങ്ങൾ ഉയർത്തി.
എന്നാൽ, നീറ്റ് വിഷയത്തിൽ പ്രതിപക്ഷം സഭയ്ക്കകത്ത് ചർച്ചയ്ക്ക് തയാറാകണമെന്ന് ആവശ്യപ്പെട്ടാണ് ഭരണപക്ഷ എം.പിമാർ പ്രതിഷേധ സ്ഥലത്തേക്ക് എത്തിയത്. വിഷയത്തിൽ ചർച്ച നടത്തുന്നതിന് സർക്കാരിന് യാതൊരു എതിർപ്പുമില്ലെന്നും പ്രതിപക്ഷം മനഃപൂർവം സഭ തടസ്സപ്പെടുത്തുകയാണെന്നും ഭരണപക്ഷ അംഗങ്ങൾ ആരോപിച്ചു.
