ന്യൂഡൽഹി: അന്താരാഷ്ട്ര യാത്രകൾ പ്ലാൻ ചെയ്യുന്ന ഇന്ത്യൻ പൗരന്മാർക്ക് ആവേശകരമായ വാർത്ത. കേന്ദ്ര വിദേശകാര്യ മന്ത്രാലയത്തിന്റെ (MEA) പുതിയ കണക്കുകൾ പ്രകാരം, 2026-ൽ ലോകത്തെ 27 രാജ്യങ്ങളിലേക്ക് ഇന്ത്യൻ പാസ്പോർട്ട് ഉടമകൾക്ക് മുൻകൂട്ടി വിസയില്ലാതെ (Visa-Free) പ്രവേശിക്കാം.
ഇതിനുപുറമേ, 47 രാജ്യങ്ങളിൽ എത്തിച്ചേരുമ്പോൾ തന്നെ വിസ ലഭ്യമാകുന്ന ‘വിസ ഓൺ അറൈവൽ’ (Visa on Arrival) സൗകര്യവും 66 രാജ്യങ്ങളിൽ ഓൺലൈൻ വഴിയുള്ള ‘ഇ-വിസ’ (e-Visa) സംവിധാനവും ലഭ്യമാണ്. ഇതോടെ ഇന്ത്യൻ സഞ്ചാരികളുടെ വിദേശയാത്രകൾ മുൻപത്തേക്കാൾ ഏറെ എളുപ്പവും വേഗത്തിലുമാകും.
ഇന്ത്യൻ വിനോദസഞ്ചാരികൾ ഏറ്റവും കൂടുതലായി തിരഞ്ഞെടുക്കുന്ന തായ്ലൻഡിൽ 30 ദിവസം വരെ വിസയില്ലാതെ പ്രവേശിക്കാം.
മലേഷ്യൻ സർക്കാരിന്റെ ഇളവ് പ്രകാരം 2026 ഡിസംബർ വരെ 30 ദിവസത്തെ വിസ രഹിത യാത്ര അനുവദിച്ചിട്ടുണ്ട്.
മാലദ്വീപിന് പകരമായി കൂടുതൽ പേർ യാത്രയ്ക്കായി തിരഞ്ഞെടുക്കുന്ന ദ്വീപ് രാജ്യമായ മൗറീഷ്യസിൽ 90 ദിവസം വരെ വിസയില്ലാതെ താമസിക്കാം.
അയൽരാജ്യങ്ങളായ നേപ്പാളിലേക്കും ഭൂട്ടാനിലേക്കും പ്രവേശന നടപടികൾ വളരെ ലളിതമാണ്. എങ്കിലും ഭൂട്ടാനിലേക്ക് യാത്ര തിരിക്കുമ്പോൾ പ്രത്യേക പ്രവേശന അനുമതി (Entry Permit) കരുതേണ്ടതുണ്ട്.
