‘ഫുൾടൈം പ്രസിഡന്റ് വരുന്നതാണ് നല്ലത്’; രാഹുൽ ഗാന്ധിയുമായി കൂടിക്കാഴ്ച നടത്തി സണ്ണി ജോസഫ്

ന്യൂഡൽഹി: കെ പി സി സി (KPCC) പ്രസിഡന്റ് പദവിയിലേക്ക് പുതിയൊരാളെ കണ്ടെത്തുന്നത് സംബന്ധിച്ച് ലോക്സഭ പ്രതിപക്ഷ നേതാവ് രാഹുൽ ഗാന്ധിയുമായി കെ പി സി സി അധ്യക്ഷൻ സണ്ണി ജോസഫ് ഡൽഹിയിൽ വെച്ച് കൂടിക്കാഴ്ച നടത്തി.

സംസ്ഥാനത്തെ നിലവിലെ രാഷ്ട്രീയ സാഹചര്യങ്ങളും കോൺഗ്രസിന്റെ സംഘടനാപരമായ പുനഃസംഘടനയുമാണ് കൂടിക്കാഴ്ചയിൽ പ്രധാനമായും ചർച്ചയായത്.

താൻ നിലവിൽ സംസ്ഥാന മന്ത്രിസഭയിൽ അംഗമായി പ്രവർത്തിക്കുന്ന സാഹചര്യത്തിൽ, പാർട്ടിയുടെ പ്രവർത്തനങ്ങൾ കൂടുതൽ ഊർജ്ജസ്വലമായി മുന്നോട്ടുകൊണ്ടുപോകാൻ കെ പി സി സിക്ക് പുതിയൊരു ഫുൾടൈം അധ്യക്ഷൻ വരുന്നതാണ് അഭികാമ്യമെന്ന അഭിപ്രായം സണ്ണി ജോസഫ് രാഹുൽ ഗാന്ധിയെ അറിയിച്ചു.

മന്ത്രിസ്ഥാനമില്ലാത്ത വ്യക്തിയായിരിക്കണം പുതിയ പ്രസിഡന്റായി വരേണ്ടതെന്ന് അദ്ദേഹം വ്യക്തമാക്കി. എം എൽ എമാർക്കും എം പിമാർക്കും ഈ പദവിയിലേക്ക് ഒരുപോലെ യോഗ്യതയുണ്ടെന്നും അദ്ദേഹം ചൂണ്ടിക്കാട്ടി.

ഹൈക്കമാൻഡ് വിഷയത്തിൽ കൃത്യമായ ആലോചനകൾ നടത്തുമെന്നും, ഏറ്റവും അനുയോജ്യനായ വ്യക്തിയെ കെ പി സി സി പ്രസിഡന്റായി ഉടൻ തന്നെ തെരഞ്ഞെടുക്കുമെന്നും കൂടിക്കാഴ്ചയ്ക്ക് ശേഷം മാധ്യമങ്ങളോട് സംസാരിക്കവേ സണ്ണി ജോസഫ് വ്യക്തമാക്കി.