അമരാവതി: മഹാരാഷ്ട്രയിലെ അമരാവതി ജില്ലാ ആശുപത്രിയിലുണ്ടായ ദാരുണമായ തീപിടിത്തത്തിൽ മൂന്ന് നവജാതശിശുക്കൾ മരിച്ചു. ഇന്ന് (ഓഗസ്റ്റ് 24) പുലർച്ചെ 3:30-തോടെയാണ് അപകടം സംഭവിച്ചത്.
ആശുപത്രിയുടെ മൂന്നാം നിലയിൽ പ്രവർത്തിക്കുന്ന സ്പെഷ്യൽ ന്യൂബോൺ കെയർ യൂണിറ്റിൽ (SNCU) വെന്റിലേറ്റർ പൊട്ടിത്തെറിച്ചതാണ് വൻ തീപിടിത്തത്തിന് കാരണമായത്. അപകടസമയത്ത് വാർഡിൽ 39 നവജാതശിശുക്കൾ ചികിത്സയിലുണ്ടായിരുന്നു
വാർഡിൽ പെട്ടെന്ന് പുകയും തീയും പടർന്നതോടെ ഡ്യൂട്ടിയിലുണ്ടായിരുന്ന ഡോക്ടർമാരും നഴ്സുമാരും മറ്റ് ജീവനക്കാരും ചേർന്ന് കുഞ്ഞുങ്ങളെ പുറത്തെത്തിക്കുകയായിരുന്നു. എങ്കിലും മൂന്ന് കുഞ്ഞുങ്ങൾക്ക് പൊള്ളലേറ്റും പുക ശ്വസിച്ചും ജീവൻ നഷ്ടമായി.
തീപിടിത്തത്തിൽ ഗുരുതരമായി പരുക്കേറ്റ 6 നവജാതശിശുക്കളെ ഉടൻ തന്നെ സമീപത്തെ സൂപ്പർ സ്പെഷ്യാലിറ്റി ആശുപത്രിയിലേക്ക് മാറ്റി തീവ്രപരിചരണ വിഭാഗത്തിൽ പ്രവേശിപ്പിച്ചു. ബാക്കിയുള്ള കുഞ്ഞുങ്ങളെ സുരക്ഷിത സ്ഥാനങ്ങളിലേക്ക് മാറ്റിയിട്ടുണ്ട്.
