കണ്ണൂർ: കോവിഡിനു മുൻപ് സർവീസ് നടത്തിയിരുന്ന ലോക്കൽ ട്രെയിനുകൾ പുനഃസ്ഥാപിക്കാത്തതിനെ തുടർന്ന് ഉത്തരകേരളത്തിൽ റെയിൽവേ യാത്രാദുരിതം രൂക്ഷമാകുന്നു. കണ്ണൂരിനു വടക്കോട്ടുള്ള ട്രെയിൻ ക്ഷാമത്തിനു പുറമേ, കണ്ണൂർ – കോഴിക്കോട് റൂട്ടിലെ സർവീസുകൾ ഇല്ലാത്തതും യാത്രക്കാർക്ക് ഇരുട്ടടിയാവുകയാണ്.
ദിവസേന ജോലിക്കും പഠനത്തിനുമായി ഈ റൂട്ടിൽ യാത്ര ചെയ്യുന്ന ആയിരക്കണക്കിന് ആളുകളാണ് നിലവിൽ ദുരിതത്തിലായിരിക്കുന്നത്. ഹ്രസ്വദൂര യാത്രക്കാർക്കായി ലോക്കൽ സർവീസുകൾ ഇല്ലാത്തത് എക്സ്പ്രസ്, സൂപ്പർഫാസ്റ്റ് ട്രെയിനുകളിലെ ജനറൽ കംപാർട്മെന്റുകളിൽ കടുത്ത തിരക്കിന് കാരണമാകുന്നു.
വൈകുന്നേരം 5.00 മണിയുടെ പരശുറാം എക്സ്പ്രസിലെ തിരക്ക് കുറയ്ക്കാനായി അനുവദിച്ച 5.35-ന്റെ പാലക്കാട്– കണ്ണൂർ എക്സ്പ്രസിന് ചെറിയ സ്റ്റേഷനുകളിൽ സ്റ്റോപ്പില്ല. കോഴിക്കോട് വിട്ടാൽ കൊയിലാണ്ടിയിലും പിന്നീട് തലശ്ശേരി, കണ്ണൂർ എന്നിവിടങ്ങളിലുമാണ് ഈ ട്രെയിൻ നിർത്തുന്നത്. ജഗന്നാഥ ടെംപിൾ ഗേറ്റ്, ധർമടം, എടക്കാട്, കണ്ണൂർ സൗത്ത് എന്നീ സ്റ്റേഷനുകളിൽ ഇറങ്ങേണ്ട യാത്രക്കാർ മാഹിയിലോ കണ്ണൂരിലോ ഇറങ്ങി ബസ് മാർഗമാണ് നിലവിൽ ലക്ഷ്യസ്ഥാനങ്ങളിൽ എത്തുന്നത്.
കോവിഡിന് മുൻപുണ്ടായിരുന്ന സർവീസുകൾ ഉടൻ പുനഃസ്ഥാപിക്കുകയും, ഇവ കാസർകോട്ടേക്ക് കൂടി നീട്ടുകയും ചെയ്യണമെന്നാണ് യാത്രക്കാരുടെയും വിവിധ സംഘടനകളുടെയും ശക്തമായ ആവശ്യം.
