വീർപ്പാട്: മേഖലയിലെ ആദിവാസി ഭൂമിയിൽ വൻതോതിൽ നടന്നു വന്നിരുന്ന ഖനന പ്രവർത്തനങ്ങൾ ഉടനടി നിർത്തിവെക്കാൻ റവന്യൂ വകുപ്പ് കർശന നിർദ്ദേശം നൽകി. പ്രദേശവാസികളായ ആദിവാസികളുടെ പരാതികളെയും പ്രതിഷേധങ്ങളെയും തുടർന്നാണ് റവന്യൂ സംഘത്തിന്റെ അടിയന്തര ഇടപെടൽ.
ഡെപ്യൂട്ടി തഹസിൽദാരുടെ നേതൃത്വത്തിലുള്ള ഉന്നതതല സംഘം തിങ്കളാഴ്ച സ്ഥലത്തെത്തി നേരിട്ട് പരിശോധന നടത്തി. പ്രദേശത്തെ പരിസ്ഥിതി നാശവും ഭൂമിയുടെ ഉടമസ്ഥാവകാശവുമായി ബന്ധപ്പെട്ട പരാതികളും വിലയിരുത്തിയ ശേഷമാണ് ഖനന പ്രവർത്തനങ്ങൾ താൽക്കാലികമായി നിർത്തിവെക്കാൻ റവന്യൂ അധികൃതർ ആവശ്യപ്പെട്ട.
ആദിവാസി വിഭാഗങ്ങൾക്ക് അവകാശപ്പെട്ട ഭൂമിയിൽ അനുമതിയില്ലാതെയാണ് ഖനനം നടന്നതെന്നാണ് പ്രാഥമിക നിഗമനം. ഖനനത്തിന് ഉപയോഗിച്ചിരുന്ന യന്ത്രങ്ങളുടെ പ്രവർത്തനവും തടഞ്ഞിട്ടുണ്ട്. ഇതുമായി ബന്ധപ്പെട്ട രേഖകൾ ഹാജരാക്കാൻ ഖനന ഏജൻസിയോട് ആവശ്യപ്പെട്ടിട്ടുണ്ടെന്നും, വില്ലേജ് ഓഫീസറുടെയും തഹസിൽദാരുടെയും വിശദമായ റിപ്പോർട്ട് ലഭിച്ച ശേഷം തുടർനടപടികൾ സ്വീകരിക്കുമെന്നും റവന്യൂ സംഘം അറിയിച്ചു.
മൈനിംഗ് ആന്റ് ജിയോളജി വകുപ്പിന്റെയും പോലീസിന്റെയും സാന്നിധ്യത്തിൽ മേഖലയിൽ നിരീക്ഷണം ശക്തമാക്കിയിട്ടുണ്ട്. നിയമവിരുദ്ധമായി ഖനനം തുടരാൻ ശ്രമിച്ചാൽ ശക്തമായ നിയമനടപടി സ്വീകരിക്കുമെന്ന് അധികൃതർ മുന്നറിയിപ്പ് നൽകി.
