കൂത്തുപറമ്പ്: നീർവേലിയിൽ പോലീസിന്റെ വൻ ലഹരിമരുന്ന് വേട്ട. കാറിൽ കടത്തുകയായിരുന്ന ഏതാണ്ട് 30 കിലോയോളം കഞ്ചാവ് പോലീസ് പിടിച്ചെടുത്തു. സംഭവവുമായി ബന്ധപ്പെട്ട് കാറിലുണ്ടായിരുന്ന മൂന്ന് പേരെ പോലീസ് കസ്റ്റഡിയിലെടുത്തിട്ടുണ്ട്.
ലഹരിമരുന്ന് സംഘങ്ങൾക്കെതിരെ പോലീസ് നടത്തുന്ന പ്രത്യേക പരിശോധനയായ ‘ഓപ്പറേഷൻ തൂഫാന്റെ’ (Operation Toofan) ഭാഗമായാണ് ഈ വൻ വേട്ട നടന്നത്. കൂത്തുപറമ്പ് പോലീസിന്റെ നേതൃത്വത്തിൽ നീർവേലി പരിസരത്ത് നടത്തിയ ശക്തമായ വാഹന പരിശോധനയ്ക്കിടയിലാണ് കഞ്ചാവ് കടത്തിയ കാർ വലയിലായത്.
പിടിച്ചെടുത്ത കഞ്ചാവിന് വിപണിയിൽ ലക്ഷങ്ങൾ വിലമതിക്കുമെന്നാണ് വിവരം. പ്രതികളെ കൂടുതൽ ചോദ്യം ചെയ്തുവരികയാണെന്നും ലഹരി കടത്തിന് പിന്നിലുള്ള മറ്റ് കണ്ണികളെക്കുറിച്ച് അന്വേഷണം ഊർജ്ജിതമാക്കിയതായും പോലീസ് അറിയിച്ചു.
