തിരുവനന്തപുരം: സംസ്ഥാനത്ത് ലഹരിമാഫിയയെ വേരോടെ പിഴുതെറിയാൻ ആഭ്യന്തരവകുപ്പ് ആരംഭിച്ച ബൃഹത്തായ പദ്ധതി ‘ഓപ്പറേഷൻ തൂഫാൻ’ വിജയകരമായി 100 ദിനങ്ങൾ പൂർത്തിയാക്കുന്നു. സർക്കാരിന്റെ ഏറ്റവും ജനകീയവും ശ്രദ്ധേയവുമായ നടപടികളിലൊന്നായി മാറിയ ഈ ദൗത്യത്തിന്റെ രണ്ടാം ഘട്ടം ഉടൻ ആരംഭിക്കുമെന്ന് ആഭ്യന്തര മന്ത്രി രമേശ് ചെന്നിത്തല അറിയിച്ചു.
100 ദിവസത്തിനകം 10,256 കേസുകൾ രജിസ്റ്റർ ചെയ്യുകയും 11,085 പേരെ അറസ്റ്റ് ചെയ്യുകയും ചെയ്തു. നഗര-ഗ്രാമ ഭേദമന്യേ ജനങ്ങളിൽ നിന്നും പൊലീസിന് വലിയ പിന്തുണയാണ് ലഭിക്കുന്നത്. ലഹരി സംഘങ്ങളെക്കുറിച്ചുള്ള വിവരങ്ങൾ കൈമാറാൻ പൊതുജനങ്ങൾ മുന്നോട്ടുവരുന്നത് പദ്ധതിയെ വലിയ വിജയത്തിലെത്തിച്ചു.
നടൻ മോഹൻലാൽ ഉൾപ്പെടെയുള്ള പ്രമുഖർ ‘തൂഫാൻ വാരിയർ’ ആയി അണിനിരന്നതോടെ പദ്ധതിക്ക് സമൂഹത്തിന്റെ വിവിധ മേഖലകളിൽ നിന്ന് വൻ പിന്തുണയാണ് ലഭിച്ചത്.
തദ്ദേശ സ്വയംഭരണ സ്ഥാപനങ്ങളുമായി കൂടുതൽ സഹകരിച്ച്, വ്യാപ്തി വർധിപ്പിച്ചായിരിക്കും ‘ഓപ്പറേഷൻ തൂഫാന്റെ’ രണ്ടാം ഘട്ടം നടപ്പിലാക്കുക.
