തിരുവനന്തപുരം: അന്താരാഷ്ട്ര ബഹിരാകാശ നിലയത്തിന് (ISS) പുറത്ത് തന്റെ കന്നി ബഹിരാകാശ നടത്തത്തിന് (Spacewalk) ഒരുങ്ങി അനിൽ മേനോൻ. 2026 ഓഗസ്റ്റ് 6 വ്യാഴാഴ്ച ഇന്ത്യൻ സമയം വൈകുന്നേരം 6:05-നാണ് ഏഴ് മണിക്കൂർ നീളുന്ന ഈ നിർണായക ദൗത്യം ആരംഭിക്കുന്നത്.
പരിചയസമ്പന്നയായ ബഹിരാകാശ യാത്രിക ജസീക്ക മെയറിനൊപ്പമാണ് അനിൽ മേനോൻ പുറത്തിറങ്ങുന്നത്. ബഹിരാകാശ നിലയത്തിന്റെ കമാൻഡറായ ജസീക്കയും ഫ്ലൈറ്റ് എഞ്ചിനീയറായ അനിലും ക്വസ്റ്റ് എയർലോക്കിലൂടെ (Quest airlock) പുറത്തുവന്ന് സ്റ്റാർബോർഡ് 6 (S6) ട്രസ്സിൽ ആവശ്യമായ ഹാർഡ്വെയറുകൾ സ്ഥാപിക്കും.
അന്താരാഷ്ട്ര ബഹിരാകാശ നിലയത്തിന്റെ സൗരോർജ്ജ സംവിധാനം ആധുനികവത്കരിക്കുന്നതിന്റെ ഭാഗമായാണ് ഈ ദൗത്യം. നിലയത്തിന്റെ ഊർജ്ജ ഉത്പാദനം വർധിപ്പിക്കുന്നതിനായി പുതിയ സൗരോർജ പാനലുകൾ സ്ഥാപിക്കുന്നതിനുള്ള മുന്നൊരുക്കങ്ങളാണ് ഇരുവരും ചേർന്ന് നടത്തുക.
ശാസ്ത്രീയ ഗവേഷണങ്ങൾ, നിലയത്തിന്റെ ദൈനംദിന പ്രവർത്തനങ്ങൾ, ഭാവിയിൽ നിലയത്തെ സുരക്ഷിതമായി നിയന്ത്രിത രീതിയിൽ ഭ്രമണപഥത്തിൽ നിന്ന് മാറ്റൽ (Controlled De-orbit) എന്നിവയ്ക്ക് ആവശ്യമായ അധിക ഊർജ്ജം ഉറപ്പാക്കാൻ ഈ പുതിയ പാനലുകൾ സഹായിക്കും.
