വാട്സ്ആപ്പ് ആപ്പിൽ നിന്ന് പുറത്തുപോകാതെ തന്നെ മറ്റ് എഐ ഏജന്റുകളുമായും ബോട്ടുകളുമായും നേരിട്ട് ആശയവിനിമയം നടത്താൻ സഹായിക്കുന്ന പുതിയ ഫീച്ചർ പരീക്ഷണത്തിൽ. വാട്സ്ആപ്പ് ഫീച്ചറുകൾ നിരീക്ഷിക്കുന്ന ‘വാബീറ്റാഇൻഫോ’യാണ് (WABetaInfo) ഇതുസംബന്ധിച്ച വിവരങ്ങൾ പുറത്തുവിട്ടത്.
ആൻഡ്രോയിഡിനായുള്ള വാട്സ്ആപ്പ് ബീറ്റ പതിപ്പ് 2.26.35.3-ൽ ഈ ഫീച്ചർ കണ്ടെത്തിയിട്ടുണ്ട്. നിലവിൽ പരിമിതമായ ആൻഡ്രോയിഡ് ബീറ്റ ഉപയോക്താക്കൾക്കിടയിലാണ് ഇത് പരീക്ഷിക്കുന്നത്.
പ്രധാന മാറ്റങ്ങൾ:
പ്രത്യേകം ചാറ്റുകൾ: ഓരോ എഐ ഏജന്റിനും പ്രത്യേക പേരും പ്രൊഫൈൽ ചിത്രവുമുള്ള സ്വതന്ത്ര ചാറ്റ് വിൻഡോകൾ ലഭിക്കും. ഒരു അക്കൗണ്ടിൽ പരമാവധി അഞ്ച് എഐ ഏജന്റുകളെ വരെ ചേർക്കാൻ സാധിച്ചേക്കും.
എപിഐ കീ ബന്ധിപ്പിക്കൽ: ആപ്പ് സെറ്റിംഗ്സിലെ പുതിയ ‘ഏജന്റ്സ്’ (Agents) വിഭാഗം വഴി ലഭിക്കുന്ന എപിഐ (API) കീ ഉപയോഗിച്ച് ബന്ധപ്പെട്ട എഐ സേവനങ്ങളെ വാട്സ്ആപ്പുമായി കണക്ട് ചെയ്യാം.
സ്വകാര്യത ഉറപ്പാക്കും: ഉപയോക്താവിന്റെ മറ്റ് വ്യക്തിഗത ചാറ്റുകൾ, കോൺടാക്റ്റുകൾ, മീഡിയ ഫയലുകൾ എന്നിവ കാണാൻ എഐ ഏജന്റുകൾക്ക് അനുമതി ഉണ്ടായിരിക്കില്ല. കൂടാതെ ഇവയെ ഗ്രൂപ്പ് ചാറ്റുകളിലോ കമ്മ്യൂണിറ്റികളിലോ ചേർക്കാനും സാധിക്കില്ല.
