തിരുവനന്തപുരം: ഓൺലൈൻ മാധ്യമങ്ങളുടെ അതിരുകടന്ന പ്രവർത്തന ശൈലിക്കെതിരെ ബിജെപി നേതാവ് കെ. സുരേന്ദ്രൻ രംഗത്ത്. കേന്ദ്രമന്ത്രിസഭയിലേക്ക് തന്റെ പേര് പരിഗണിക്കുന്നുവെന്ന വാർത്തകൾ അദ്ദേഹം പൂർണ്ണമായും തള്ളി.
ഓൺലൈൻ മാധ്യമങ്ങളിലെ ഊഹാപോഹങ്ങളോ മാധ്യമപ്രവർത്തകരുടെ എഴുത്തോ നോക്കിയല്ല പ്രധാനമന്ത്രി നരേന്ദ്ര മോദി മന്ത്രിസഭ പുനഃസംഘടിപ്പിക്കുന്നതെന്ന് അദ്ദേഹം തിരുവനന്തപുരത്ത് വ്യക്തമാക്കി.മാധ്യമങ്ങളുടെ ധാർമ്മികതയെയും വ്യക്തിസ്വാതന്ത്ര്യത്തിലേക്കുള്ള കടന്നുകയറ്റത്തെയും സുരേന്ദ്രൻ ശക്തമായി ചോദ്യം ചെയ്തു.
ഒരു മഹാനടൻ അന്തരിച്ചു കിടന്നപ്പോൾ ഓൺലൈൻ മാധ്യമങ്ങൾ കാട്ടിയ നിലപാടില്ലായ്മയെ അദ്ദേഹം വിമർശിച്ചു. ഇത്തരം സന്ദർഭങ്ങളിൽ കുറഞ്ഞപക്ഷം മനുഷ്യത്വമെങ്കിലും കാണിക്കണമെന്ന് അദ്ദേഹം ഓർമ്മിപ്പിച്ചു.
കഴിഞ്ഞ ദിവസം ഗുരുവായൂരിൽ ഒരു വിവാഹ ചടങ്ങിൽ പങ്കെടുത്തപ്പോൾ, ചായ കുടിക്കുന്നിടത്തുപോലും ക്യാമറകളുമായി പിന്നാലെ നടന്ന് സ്വകാര്യ സംഭാഷണങ്ങൾ പകർത്തിയതായി അദ്ദേഹം കുറ്റപ്പെടുത്തി. എന്തും എഴുതാമെന്ന അവസ്ഥ മാധ്യമ മര്യാദയ്ക്ക് നിരക്കാത്തതാണെന്നും എല്ലാവർക്കും വ്യക്തിസ്വാതന്ത്ര്യമുണ്ടെന്നും കെ. സുരേന്ദ്രൻ കൂട്ടിച്ചേർത്തു.
