കാസർകോട്: നെല്ലിക്കുന്ന് കടപ്പുറത്ത് തലയില്ലാത്ത നിലയിൽ പുരുഷന്റെ മൃതദേഹം കണ്ടെത്തിയ സംഭവത്തിൽ ദുരൂഹതയേറുന്നു. കടലിൽ ഒഴുകിയെത്തിയ ഈ മൃതദേഹം നേരത്തെ പോസ്റ്റ്മോർട്ടം ചെയ്തതാണെന്ന സൂചനകളാണ് ഇപ്പോൾ പുറത്തുവരുന്നത്.
മൃതദേഹത്തിലുണ്ടായിരുന്ന തുന്നലുകളും മുറിവുകളും മുൻപ് പോസ്റ്റ്മോർട്ടം നടത്തിയതിന്റെ ഭാഗമാണെന്ന് പോലീസ് സ്ഥിരീകരിച്ചിട്ടുണ്ട്.
എന്നാൽ, ഇത് കേരളത്തിൽ വെച്ച് പോസ്റ്റ്മോർട്ടം ചെയ്ത മൃതദേഹമല്ലെന്നാണ് പ്രാഥമിക നിഗമനം. മറ്റ് സംസ്ഥാനങ്ങളിൽ എവിടെയെങ്കിലും ഇൻക്വസ്റ്റ് നടപടികൾക്ക് ശേഷം സംസ്കരിച്ച മൃതദേഹം കടലാക്രമണത്തിലോ ശക്തമായ തിരമാലകളിലോ പെട്ട് ഒഴുകിയെത്തിയതാണോ എന്ന കാര്യമാണ് പോലീസ് ഇപ്പോൾ പ്രധാനമായും പരിശോധിക്കുന്നത്.
ഇക്കഴിഞ്ഞ ശനിയാഴ്ചയാണ് മത്സ്യത്തൊഴിലാളികൾ നെല്ലിക്കുന്ന് കടപ്പുറത്ത് മൃതദേഹം ആദ്യമായി കാണുന്നത്.
ഏകദേശം ഒരു മാസത്തോളം പഴക്കമുള്ള മൃതദേഹത്തിന്റെ തലയും കാലിലെ മാംസഭാഗങ്ങളും പൂർണ്ണമായും വേർപെട്ട നിലയിലായിരുന്നു. ജീർണ്ണിച്ചതിനെ തുടർന്ന് ശരീരത്തിലെ അസ്ഥികൾ പലതും പുറത്തേക്ക് തള്ളിയ അവസ്ഥയിലാണ്.
മൃതദേഹത്തിന് കൃത്യമായി എത്ര പഴക്കമുണ്ടെന്നോ, ഏത് പ്രായത്തിലുള്ളയാളുടേതാണെന്നോ കണ്ടെത്താൻ നിലവിൽ സാധിച്ചിട്ടില്ല. സംഭവത്തിൽ അസ്വാഭാവിക മരണത്തിന് കേസെടുത്ത് പോലീസ് വിശദമായ അന്വേഷണം ആരംഭിച്ചിട്ടുണ്ട്.
സമാനമായ രീതിയിൽ കാണാതായവരെക്കുറിച്ചുള്ള വിവരങ്ങൾ അയൽ സംസ്ഥാനങ്ങളിലെ തീരദേശ പോലീസ് സ്റ്റേഷനുകളിലേക്ക് കൈമാറി അന്വേഷണം വ്യാപിപ്പിക്കാനാണ് പോലീസ് തീരുമാനം.
