ആലപ്പുഴ: ഹരിപ്പാട് കരുവാറ്റയിൽ വയോധികനായ ശിവൻകുട്ടി (67) കൊല്ലപ്പെട്ട സംഭവത്തിൽ ഞെട്ടിക്കുന്ന വെളിപ്പെടുത്തലുകളുമായി പോലീസ്. കൊല്ലപ്പെട്ട ശിവൻകുട്ടിയുടെ ബന്ധുവായ 13 വയസ്സുകാരി നൽകിയ ക്വട്ടേഷന്റെ അടിസ്ഥാനത്തിലാണ് കൊലപാതകം നടന്നതെന്ന് അന്വേഷണ സംഘം വ്യക്തമാക്കി. സംഭവവുമായി ബന്ധപ്പെട്ട് 8-ാം ക്ലാസുകാരിയായ പെൺകുട്ടിയെയും കൃത്യം നിർവ്വഹിച്ച പ്രായപൂർത്തിയാകാത്ത മൂന്ന് ആൺകുട്ടികളെയും പോലീസ് കസ്റ്റഡിയിലെടുത്തു.
ഐഫോണും ബൈക്കും വാങ്ങാൻ ആസൂത്രിത കവർച്ച
വീട്ടിലുണ്ടായിരുന്ന സ്വർണാഭരണങ്ങളും പണവും കവർന്ന് പെൺകുട്ടിക്ക് ഐഫോണും (iPhone) മറ്റു പ്രതികൾക്ക് ബൈക്കും വാങ്ങാനായിരുന്നു പദ്ധതി. ശിവൻകുട്ടിയുടെ മകളുടെ പ്രസവാവശ്യത്തിനായി ഭാര്യയും മകളും വണ്ടാനം മെഡിക്കൽ കോളേജ് ആശുപത്രിയിലായിരുന്ന സമയത്താണ് കൗമാര സംഘം മോഷണവും കൊലപാതകവും ആസൂത്രണം ചെയ്തത്.
ലൈവ് വീഡിയോ കോളിലൂടെ കൊലപാതക ദൃശ്യങ്ങൾ
ഞായറാഴ്ച രാത്രി വീട്ടിൽ ശിവൻകുട്ടി തനിച്ചായിരുന്ന സമയത്ത് ശൗചാലയത്തിന്റെ വെന്റിലേഷൻ വഴിയാണ് പ്രതികൾ അകത്തുകടന്നത്. തുടർന്ന് കൈകാലുകൾ കൂട്ടിക്കെട്ടി അതിക്രൂരമായി ശിവൻകുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നു. കൊലപാതകം നടത്തുന്ന തത്സമയ ദൃശ്യങ്ങൾ പ്രതികൾ വീഡിയോ കോളിലൂടെ ക്വട്ടേഷൻ നൽകിയ പെൺകുട്ടിയെ കാട്ടിക്കൊടുത്തതായും പോലീസ് കണ്ടെത്തി.
കൃത്യത്തിന് ശേഷം തെളിവ് നശിപ്പിക്കുന്നതിനായി പ്രതികൾ വീടിനുള്ളിൽ മുളകുപൊടി വിതറിയിരുന്നു. സംഭവം നടക്കുമ്പോൾ പെൺകുട്ടി ഈ വീട്ടിൽ ഉണ്ടായിരുന്നില്ല.
