കൊച്ചി: സംസ്ഥാനത്ത് ലഹരിമരുന്ന് വിപത്തുകൾക്കെതിരെ പോലീസ് ശക്തമാക്കിയ ‘ഓപ്പറേഷൻ തൂഫാൻ’ (Operation Toofan) 78 ദിവസം പിന്നിടുമ്പോൾ ലഹരിക്കേസുകളിൽ അറസ്റ്റിലായവരുടെ എണ്ണം പതിനായിരത്തിലേക്ക് അടുത്തതായി റിപ്പോർട്ട്. ചുരുങ്ങിയ ദിവസങ്ങൾക്കുള്ളിൽ 9,213 കേസുകളിലായി 9,941 പേരെയാണ് പോലീസ് അറസ്റ്റ് ചെയ്തത്.
പരിശോധനകളിൽ ഇതുവരെ 8.24 കിലോ എം.ഡി.എം.എയും (MDMA) 979 കിലോ കഞ്ചാവും പോലീസ് പിടിച്ചെടുത്തു. ഇതിൽ എം.ഡി.എം.എയ്ക്ക് മാത്രം വിപണിയിൽ ഏകദേശം നാല് കോടിയോളം രൂപ വിലമതിക്കും. നിലവിലെ കണക്കനുസരിച്ച് പ്രതിദിനം ശരാശരി 127 പേരാണ് ലഹരിമരുന്നുമായി സംസ്ഥാനത്ത് പിടിയിലാകുന്നത്.
പോലീസ് നടപടി ശക്തമായി തുടരുമ്പോഴും അറസ്റ്റിലാകുന്നവരിൽ ഭൂരിഭാഗവും ചെറുകിട വിൽപ്പനക്കാരോ ലഹരി ഉപയോഗിക്കുന്നവരോ ആണ്. രാസലഹരികളുടെയും കഞ്ചാവിന്റെയും പ്രധാന വിതരണ ശൃംഖലകൾ കേരളത്തിന് പുറത്താണ് പ്രവർത്തിക്കുന്നത്.
ബെംഗളൂരു, ഡൽഹി, ഗോവ എന്നീ നഗരങ്ങളിൽ നിന്നാണ് എം.ഡി.എം.എ പ്രധാനമായും കേരളത്തിലേക്ക് ഒഴുകുന്നത്. ഇവരുടെ പ്രാദേശിക ഏജന്റുമാരെയും ചെറുകിട കച്ചവടക്കാരെയും മാത്രമാണ് നിലവിൽ വലയിലാക്കാൻ സാധിക്കുന്നത്. പ്രധാന ഉറവിടങ്ങളെ തകർക്കുക എന്നത് പോലീസിന് വലിയ വെല്ലുവിളിയായി തുടരുന്നു.
ഓപ്പറേഷൻ തൂഫാന്റെ ഭാഗമായി അറസ്റ്റുകൾ വലിയതോതിൽ ഉയർന്നതോടെ സംസ്ഥാനത്തെ ജയിലുകളിൽ കടുത്ത തിരക്ക് അനുഭവപ്പെടുന്നുണ്ട്. മിക്ക സബ് ജയിലുകളിലും പരമാവധി ശേഷിയേക്കാൾ 30 ശതമാനം വരെ കൂടുതൽ തടവുകാരെയാണ് പാർപ്പിച്ചിരിക്കുന്നത്.
