2026-ലെ വൈദ്യശാസ്ത്രത്തിനുള്ള നൊബേൽ പുരസ്കാരം ഒപ്റ്റോജെനറ്റിക്സ് (Optogenetics) രംഗത്തെ പ്രമുഖ ഗവേഷകരായ കാൾ ഡെയ്‌സെറോത്ത് (54), പീറ്റർ ഹെഗമാൻ (71), ജോർജ് നാഗൽ (73) എന്നിവർക്ക് ലഭിച്ചു. സ്വീഡനിലെ സ്റ്റോക്ക്‌ഹോമിലുള്ള കരോലിൻസ്‌ക ഇൻസ്റ്റിറ്റ്യൂട്ടിലെ നോബൽ അസംബ്ലിയാണ് പുരസ്കാരം പ്രഖ്യാപിച്ചത്.
തലച്ചോറിലെ വ്യക്തിഗത നാഡീകോശങ്ങളുടെ (neurons) പ്രവർത്തനം നിയന്ത്രിക്കുന്നതിനായുള്ള സംവിധാനങ്ങളെക്കുറിച്ചുള്ള പഠനത്തിനാണ് മൂവർക്കും ഈ ആദരം ലഭിച്ചത്. അമേരിക്കൻ, ജർമൻ ശാസ്ത്രജ്ഞരായ ഇവർ നിലവിൽ വിവിധ പ്രമുഖ സർവ്വകലാശാലകളിൽ സേവനമനുഷ്ഠിച്ചു വരുന്നു. കാൾ ഡെയ്‌സെറോത്ത് കാലിഫോർണിയയിലെ സ്റ്റാൻഫോർഡ് യൂണിവേഴ്സിറ്റിയിലും, പീറ്റർ ഹെഗമാൻ ബെർലിനിലെ ഹംബോൾട്ട് സർവ്വകലാശാലയിലും, ജോർജ് നാഗൽ ജർമനിയിലെ വുർസ്ബർഗ് സർവ്വകലാശാലയിലുമാണ് പ്രവർത്തിക്കുന്നത്.
പ്രകാശ നിയന്ത്രിത അയോൺ ചാനലുകളെക്കുറിച്ചും ഒപ്റ്റോജെനറ്റിക്സിനെക്കുറിച്ചുമുള്ള ഇവരുടെ കണ്ടെത്തലുകൾ നാഡീശാസ്ത്ര രംഗത്ത് വലിയ മാറ്റങ്ങൾക്കാണ് വഴിവെച്ചത്. പ്രകാശം ഉപയോഗിച്ച് നാഡീകോശങ്ങളെ ഉത്തേജിപ്പിക്കാനും അവയുടെ പ്രവർത്തനം കൃത്യതയോടെ നിയന്ത്രിക്കാനും ഈ സാങ്കേതികവിദ്യയിലൂടെ സാധിക്കുന്നു. തലച്ചോറിന്റെ സങ്കീർണ്ണമായ പ്രവർത്തന രഹസ്യങ്ങൾ വെളിപ്പെടുത്താനും വിവിധ നാഡീവ്യൂഹ രോഗങ്ങളെക്കുറിച്ചുള്ള പഠനങ്ങൾക്കും ഈ രീതി ഇപ്പോൾ ലോകമെമ്പാടുമുള്ള ശാസ്ത്ര ലബോറട്ടറികളിൽ വ്യാപകമായി ഉപയോഗിച്ചുവരുന്നുണ്ടെന്ന് നൊബേൽ സമിതി എക്സിൽ (X) കുറിച്ചു.
