തിരുവനന്തപുരം: സംസ്ഥാനത്ത് പെയ്യുന്ന അതിതീവ്ര മഴയിലും പ്രളയ സമാനമായ സാഹചര്യത്തിലും വ്യാപക നാശനഷ്ടങ്ങൾ. വിവിധ ജില്ലകളിലായുണ്ടായ ഉരുൾപൊട്ടലിലും വെള്ളപ്പൊക്കത്തിലും പെട്ട് ഇതുവരെ ഏഴ് പേർ മരണപ്പെട്ടു.
പത്തനംതിട്ട, കോട്ടയം, ഇടുക്കി, കോഴിക്കോട് ജില്ലകളിലാണ് പ്രളയഭീതിയും മഴക്കെടുതിയും ഏറ്റവും രൂക്ഷമായി ബാധിച്ചിരിക്കുന്നത്. പത്തനംതിട്ട റാന്നിയിൽ പമ്പയാർ കരകവിഞ്ഞൊഴുകിയതിനെ തുടർന്ന് ജനവാസ മേഖലകളും ടൗണും പൂർണ്ണമായും വെള്ളത്തിനടിയിലാവുകയും സ്ഥിതി അതീവ ഗുരുതരമായി തുടരുകയും ചെയ്യുന്നു. കൂടാതെ കോഴിക്കോട് ഈങ്ങാപ്പുഴ ഉൾപ്പെടെയുള്ള മലയോര മേഖലകളിലും മലപ്പുറത്തും ഒറ്റരാത്രി കൊണ്ട് പെയ്ത മഴയിൽ കനത്ത വെള്ളപ്പൊക്കവും നാശനഷ്ടങ്ങളുമുണ്ടായി.
മഴക്കെടുതിയിൽ കോട്ടയം പൂഞ്ഞാർ തെക്കേക്കരയിൽ ഉരുൾപൊട്ടി വീട് ഇടിഞ്ഞു വീണ് ജോസഫിൻ ജോണി, അമ്മ റജീന എന്നിവരും, ഇടുക്കി അടൂർമലയിൽ ഉരുൾപൊട്ടലിൽ കുടയത്തൂർ സ്വദേശി സുമതിയും, കോലാഹലമേട്ടിൽ മണ്ണുവീണ് പ്രഭാകരൻ നായരും മരിച്ചു. മലപ്പുറത്ത് ഒഴുക്കിൽപ്പെട്ട് മൂന്നും നാലും വയസ്സുള്ള രണ്ട് കുട്ടികളും, വയനാട് പടിഞ്ഞാറെത്തറയിൽ വെള്ളം പമ്പ് ചെയ്യുന്നതിനിടെ ഷോക്കേറ്റ് ബെന്നി എന്നയാളും, കൊല്ലം നീണ്ടകരയിൽ വള്ളം മറിഞ്ഞ് രാധാകൃഷ്ണനും മരണപ്പെട്ടു.
നിലവിൽ കേന്ദ്ര കാലാവസ്ഥ വകുപ്പ് ഒമ്പത് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. മൂഴിയാർ, കല്ലാർകുട്ടി, ലോവർ പെരിയാർ, പെരിങ്ങൽകുത്ത്, നെയ്യാർ, മംഗലം എന്നീ ആറ് ഡാമുകളിലും റെഡ് അലർട്ട് നിലവിലുണ്ട്. പമ്പ, മണിമല നദികളിൽ ജലനിരപ്പ് അപായകരമായി ഉയരുന്ന സാഹചര്യത്തിൽ വിനോദസഞ്ചാരവും മലയോര മേഖലകളിലെ രാത്രി യാത്രയും നിരോധിച്ചിട്ടുണ്ട്.
പൊതുജനങ്ങൾ അതീവ ജാഗ്രത പാലിക്കണമെന്നും അധികൃതരുടെ നിർദ്ദേശങ്ങൾ കർശനമായി പിന്തുടരണമെന്നും മുഖ്യമന്ത്രിയും ദുരന്തനിവാരണ അതോറിറ്റിയും അഭ്യർത്ഥിച്ചു.
