ന്യൂഡൽഹി: പരീക്ഷാ നടത്തിപ്പിലെ വീഴ്ചകളെയും ചോദ്യക്കടലാസ് ചോർച്ചയെയും തുടർന്ന് നാഷണൽ ടെസ്റ്റിങ് ഏജൻസിയിൽ (NTA) വ്യാപക നടപടികളുമായി കേന്ദ്ര വിദ്യാഭ്യാസ മന്ത്രാലയം. ഏജൻസിയിലെ 50-ലധികം ജീവനക്കാരെ ജോലിയിൽ നിന്ന് പുറത്താക്കി. പരീക്ഷാ സംവിധാനം പൂർണ്ണമായി പുനഃസംഘടിപ്പിക്കുന്നതിന്റെ ഭാഗമായി 10 പ്രധാന നേതൃതസ്തികകളിലേക്ക് പ്രൊഫഷണലുകളെ നിയമിക്കുന്നതിന് വിജ്ഞാപനം പുറപ്പെടുവിച്ചു.
എല്ലാ പഴുതുകളുമടച്ച് സുരക്ഷിതമായി വേണം ഇനി വരുന്ന പരീക്ഷകൾ സംഘടിപ്പിക്കാനെന്ന് കേന്ദ്ര വിദ്യാഭ്യാസ മന്ത്രി പ്രൾഹാദ് ജോഷി എൻ.ടി.എ.യോട് നിർദേശിച്ചു. യു.ജി.സി. നെറ്റ് പരീക്ഷയിലെ മൂന്ന് വിഷയങ്ങളിൽ പുനഃപരീക്ഷ പ്രഖ്യാപിച്ചതിന് പിന്നാലെ വിളിച്ചുചേർത്ത ഉന്നതതല യോഗത്തിലാണ് മന്ത്രിയുടെ കർശന നിർദേശം.
മുഴുവൻ പരീക്ഷാനടപടികളെക്കുറിച്ചും സമഗ്രമായ പരിശോധന നടത്താനും, തിരുത്തൽ നടപടികൾ വ്യക്തമാക്കുന്ന റിപ്പോർട്ട് ഉടനടി സമർപ്പിക്കാനും അദ്ദേഹം ആവശ്യപ്പെട്ടു.
ചോദ്യക്കടലാസ് തയ്യാറാക്കൽ ഉൾപ്പെടെയുള്ള രഹസ്യസ്വഭാവമുള്ള പ്രവർത്തനങ്ങളുടെ നിലവിലെ രീതികൾ പൂർണ്ണമായി പൊളിച്ചെഴുതണം. ചോദ്യപേപ്പർ തയ്യാറാക്കുന്നതിനായി പ്രത്യേക സുരക്ഷാ മുറികൾ സജ്ജമാക്കണം. ചോദ്യപേപ്പർ തയ്യാറാക്കുന്നതിൽ പങ്കാളികളാകുന്നവരെ കൃത്യമായ പരിശോധനകൾക്ക് വിധേയരാക്കണം. ഡിജിറ്റൽ സാമഗ്രികളും ഫോണുകളും സൂക്ഷിക്കുന്നതിനായി നിർദിഷ്ട പ്രോട്ടോകോൾ യുദ്ധകാലാടിസ്ഥാനത്തിൽ നടപ്പാക്കണം.
നീറ്റ് (NEET) പരീക്ഷാ ചോർച്ചയും യു.ജി.സി. നെറ്റ് പരീക്ഷയിലെ വീഴ്ചകളും വലിയ പ്രതിഷേധങ്ങൾക്ക് വഴിവെച്ച പശ്ചാത്തലത്തിലാണ് കേന്ദ്ര സർക്കാർ പരീക്ഷാ ഏജൻസിയിൽ നേരിട്ട് ഇടപെട്ട് സുരക്ഷ ശക്തമാക്കുന്നത്.
