തിരുവനന്തപുരം: പയ്യന്നൂരിലും തളിപ്പറമ്പിലും നടത്തിയ രാഷ്ട്രീയ വിശദീകരണ യോഗങ്ങളിലെ പിണറായി വിജയന്റെ പ്രസംഗങ്ങൾ ജനങ്ങളോടുള്ള പരസ്യമായ വെല്ലുവിളിയാണെന്ന് ടി.കെ. ഗോവിന്ദൻ എംഎൽഎ കുറ്റപ്പെടുത്തി.
തെരഞ്ഞെടുപ്പിലെ തോൽവിയെക്കുറിച്ച് സിപിഎം കേന്ദ്ര കമ്മിറ്റി കണ്ടെത്തിയ കാര്യങ്ങൾ വിശദീകരിക്കേണ്ടയിടത്ത് അതിന് വിരുദ്ധമായ കാര്യങ്ങളാണ് പോളിറ്റ് ബ്യൂറോ അംഗം എന്ന നിലയിൽ പിണറായി സംസാരിച്ചത്. തളിപ്പറമ്പിലെ സ്ഥാനാർഥി നിർണയം പാളിയെന്ന് കേന്ദ്ര കമ്മിറ്റി പരസ്യമായി സമ്മതിച്ചതാണെങ്കിലും, പ്രസംഗത്തിൽ ആ പോരായ്മയെക്കുറിച്ച് പിണറായി മിണ്ടിയില്ല. ഇത് പാർട്ടി തെറ്റുതിരുത്താൻ തയ്യാറല്ല എന്നതിന്റെ വ്യക്തമായ ദൃഷ്ടാന്തമാണെന്നും ഇത് ഏത് തരം പാർട്ടി രീതിയാണെന്നും ഗോവിന്ദൻ ചോദിച്ചു.
സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിനെതിരെയും ഗോവിന്ദൻ രൂക്ഷമായ ഭാഷയിൽ പ്രതികരിച്ചു. രാഗേഷ് ജനിക്കുന്നതിന് മുൻപ് പാർട്ടി നേതൃത്വത്തിൽ വന്നയാളാണ് ഞാൻ. എന്നെ വിമർശിക്കുന്നതിന് മുൻപ് രാഗേഷ് സ്വന്തം കണ്ണാടിയിൽ നോക്കണം. വ്യക്തി അധിക്ഷേപങ്ങൾക്ക് അതേനാണയത്തിൽ തിരിച്ചടിക്കാൻ താൽപ്പര്യപ്പെടുന്നില്ല. വയറിങ്, പ്ലംബിങ് തൊഴിലാളിയായാണ് രാഗേഷ് പാർട്ടിയിലേക്ക് വന്നത്. അദ്ദേഹത്തിന്റെ അന്നത്തെ സ്വത്തും ഇന്നത്തെ സ്വത്തും തമ്മിലുള്ള വ്യത്യാസത്തെക്കുറിച്ച് സമഗ്രമായ അന്വേഷണം നടത്തണം, എന്നും ടി.കെ. ഗോവിന്ദൻ ആവശ്യപ്പെട്ടു.
