കൊച്ചി: സംസ്ഥാന ആസൂത്രണ ബോർഡ് പരീക്ഷാക്രമക്കേടിൽ കേരള പബ്ലിക് സർവീസ് കമ്മീഷനെ (പിഎസ്‍സി) രൂക്ഷമായി വിമർശിച്ച് ഹൈക്കോടതി. പരീക്ഷയിൽ 58 മാർക്കിന്റെ ചോദ്യങ്ങൾക്ക് മൂല്യനിർണയം നടത്താതിരുന്നത് ‘പ്രത്യക്ഷ അഴിമതി’ അല്ലേ എന്ന് ചോദിച്ച കോടതി, പിഎസ്‍സി ചെയ്ത കുറ്റകൃത്യങ്ങൾ അന്വേഷിക്കാൻ രാജ്യത്ത് പ്രത്യേക സംവിധാനം വേണ്ടേയെന്നും ആരാഞ്ഞു. ക്രൈംബ്രാഞ്ച് അന്വേഷണം ചോദ്യം ചെയ്ത് പിഎസ്‍സി സമർപ്പിച്ച റിട്ട് ഹർജി പരിഗണിക്കവെയായിരുന്നു ഹൈക്കോടതിയുടെ കർശന നിലപാട്.
58 ചോദ്യങ്ങളുടെ മൂല്യനിർണയം ഒഴിവാക്കിയത് കേവലം ‘ക്ലറിക്കൽ മിസ്റ്റേക്ക്’ എന്ന് ന്യായീകരിക്കാൻ കഴിയില്ലെന്ന് സർക്കാരും കോടതിയിൽ വാദിച്ചു. പിഎസ്‍സിക്കെതിരെ നിലവിൽ 180-ലേറെ പരാതികൾ നിലവിലുണ്ടെന്നും, ക്രൈംബ്രാഞ്ചിന്റെ അന്വേഷണത്തോടു പിഎസ്‍സി ചെയർമാൻ അടക്കമുള്ളവർ സഹകരിക്കുന്നില്ലെന്നും സർക്കാർ കോടതിയെ അറിയിച്ചു.
നോട്ടിസ് നൽകിയിട്ടും ഹാജരാകുന്നില്ലെങ്കിൽ കടുത്ത നടപടികളിലേക്ക് പോകാൻ സർക്കാരിനോട് കോടതി ആവശ്യപ്പെട്ടു. ലക്ഷക്കണക്കിന് ഉദ്യോഗാർത്ഥികളുടെയും യുവതലമുറയുടെയും പ്രതീക്ഷയായ പിഎസ്‍സിയുടെ വിശ്വാസ്യത സംരക്ഷിക്കപ്പെടേണ്ടതുണ്ടെന്നും, കേസിൽ കർശന നടപടിയുമായി സർക്കാർ മുന്നോട്ടുപോകണമെന്നും ഹൈക്കോടതി നിർദേശിച്ചു.
