തിരുവനന്തപുരം: ഇൻഡിഗോ വിമാനത്തിനുള്ളിൽ യൂത്ത് കോൺഗ്രസ് പ്രവർത്തകരെ മർദ്ദിച്ചെന്ന പരാതിയിൽ സിപിഐഎം നേതാവ് ഇ പി ജയരാജനെതിരെ തുടരന്വേഷണത്തിന് പ്രത്യേക അന്വേഷണ സംഘത്തെ (SIT) രൂപീകരിച്ചു.
തിരുവനന്തപുരം സിറ്റി പോലീസ് കമ്മീഷണറുടെ ഉത്തരവിനെത്തുടർന്ന് ഒരു അസിസ്റ്റന്റ് പോലീസ് കമ്മീഷണറുടെ (ACP) നേതൃത്വത്തിലാണ് പുതിയ സംഘം കേസ് അന്വേഷിക്കുക.
കേസ് എഴുതിത്തള്ളാൻ അനുമതി തേടി പോലീസ് സമർപ്പിച്ച റഫർ റിപ്പോർട്ട് തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി കഴിഞ്ഞ ദിവസം തള്ളിയിരുന്നു. തുടർന്നാണ് സംഭവത്തിൽ കൃത്യമായ തുടരന്വേഷണം നടത്തി റിപ്പോർട്ട് സമർപ്പിക്കാൻ കോടതി ഉത്തരവിട്ടത്.
ഇ പി ജയരാജന് പുറമെ, മുഖ്യമന്ത്രിയുടെ മുൻ ഗൺമാൻ അനിൽ കുമാറിനെതിരെയും ഈ കേസിൽ അന്വേഷണം നടക്കും.
കണ്ണൂരിൽ നിന്നും തിരുവനന്തപുരത്തേക്കുള്ള വിമാനയാത്രയ്ക്കിടെ മുഖ്യമന്ത്രിക്കെതിരെ പ്രതിഷേധിച്ച തങ്ങളെ മർദ്ദിച്ചുവെന്ന് കാണിച്ച് യൂത്ത് കോൺഗ്രസ് പ്രവർത്തകരാണ് കോടതിയെ സമീപിച്ചിരുന്നത്.
കോടതി നിർദ്ദേശപ്രകാരം വിമാനത്തിലെ സിസിടിവി ദൃശ്യങ്ങൾ ഉൾപ്പെടെയുള്ള തെളിവുകൾ വിശദമായി പുനഃപരിശോധിച്ചാകും എസ്ഐടിയുടെ പുതിയ അന്വേഷണം.
