കോഴിക്കോട്: നാദാപുരം താലൂക്ക് ആശുപത്രിയിൽ ചികിത്സയിൽ കഴിഞ്ഞിരുന്ന രോഗിക്ക് മരുന്ന് മാറി നൽകിയതായി ഗുരുതര പരാതി. മരുന്ന് മാറിയതിനെ തുടർന്ന് അബോധാവസ്ഥയിലായ കോഴിക്കോട് മുടവന്തേരി സ്വദേശി ചന്ദ്രനെ അതീവ ഗുരുതരാവസ്ഥയിൽ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
ആശുപത്രി അധികൃതരുടെ ഭാഗത്തുനിന്നും കടുത്ത അനാസ്ഥയാണ് ഉണ്ടായതെന്ന് രോഗിയുടെ ബന്ധുക്കൾ ആരോപിക്കുന്നു. സംഭവത്തെക്കുറിച്ച് ബന്ധുക്കൾ ഉന്നയിക്കുന്ന പ്രധാന ആരോപണങ്ങൾ ഇവയാണ്:
ചന്ദ്രന് തൊട്ടടുത്ത ബെഡ്ഡിൽ ചികിത്സയിൽ കഴിഞ്ഞിരുന്ന മറ്റൊരു രോഗിക്ക് നൽകേണ്ട മരുന്നാണ് ഡ്യൂട്ടിയിലുണ്ടായിരുന്നവർ മാറി നൽകിയത്.
മരുന്ന് മാറിയ വിവരം പുറത്തായതോടെ തങ്ങളുടെ ഭാഗത്തെ പിഴവ് മറച്ചുവെക്കാൻ ആശുപത്രിയിലെ ഔദ്യോഗിക രേഖകളിൽ അധികൃതർ കൃത്രിമം കാണിച്ചതായും ബന്ധുക്കൾ ആരോപിക്കുന്നു.
അതേസമയം ചന്ദ്രന് കടുത്ത ന്യുമോണിയ ബാധിച്ചിട്ടുണ്ടായിരുന്നു എന്ന കാര്യം കണ്ടെത്താനും താലൂക്ക് ആശുപത്രി അധികൃതർക്ക് കഴിഞ്ഞില്ലെന്ന് കുടുംബം വ്യക്തമാക്കുന്നു.
