തിരുവനന്തപുരം: പറയുന്ന കാര്യങ്ങളിൽ ഒട്ടും ഉറച്ചുനിൽക്കാത്ത ആളാണ് മുഖ്യമന്ത്രി വി.ഡി. സതീശനെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ.
പി.എം. ശ്രീ പദ്ധതി, കരിമണൽ ഖനനം, വീര്യം കുറഞ്ഞ മദ്യത്തിന്റെ നികുതി ഇളവ് തുടങ്ങിയ വിഷയങ്ങളിലെല്ലാം മുഖ്യമന്ത്രിയുടേത് ഇരട്ടത്താപ്പാണെന്ന് ഗോവിന്ദൻ ആരോപിച്ചു.
ഇടതുപക്ഷ സർക്കാരാണ് കേരളത്തിൽ അധികാരത്തിൽ ഉണ്ടായിരുന്നതെങ്കിൽ ഒരു കാരണവശാലും പി.എം. ശ്രീ (PM-SHRI) പദ്ധതി സംസ്ഥാനത്ത് നടപ്പിലാക്കുമായിരുന്നില്ലെന്ന് അദ്ദേഹം കൂട്ടിച്ചേർത്തു.
മുൻപ് പി.എം. ശ്രീ പദ്ധതിയെ ശക്തമായി എതിർത്തതിന്റെ പേരിൽ ഇടതുപക്ഷ നേതാക്കളെ ‘അറബിക്കടലിലും ചവറ്റുകുട്ടയിലും എറിയും’ എന്ന് പ്രസംഗിച്ചവരാണ് കോൺഗ്രസുകാരെന്ന് അദ്ദേഹം ഓർമ്മിപ്പിച്ചു. എന്നാൽ മുഖ്യമന്ത്രിയായി അധികാരമേറ്റയുടൻ തന്നെ യാതൊരുവിധ ജാള്യതയുമില്ലാതെ ആ പദ്ധതി കേരളത്തിൽ നടപ്പിലാക്കുമെന്ന് വി.ഡി. സതീശൻ പ്രഖ്യാപിച്ചത് അദ്ദേഹത്തിന്റെ അവസരവാദ രാഷ്ട്രീയത്തിന് തെളിവാണെന്നും എം.വി. ഗോവിന്ദൻ കുറ്റപ്പെടുത്തി.
