തിരുവനന്തപുരം: പ്രതിപക്ഷ ഉപനേതാവ് പദവിയെച്ചൊല്ലി ഇടതുമുന്നണിയിൽ (LDF) നിലനിൽക്കുന്ന തർക്കങ്ങളിൽ അന്തിമ തീരുമാനമായില്ല. വിഷയം പരിഹരിക്കുന്നതിനായി സി.പി.എം – സി.പി.ഐ ഉഭയകക്ഷി ചർച്ചകൾ പുരോഗമിക്കുകയാണ്.
സി.പി.ഐ സംസ്ഥാന കമ്മിറ്റി ഓഫീസായ എം.എൻ സ്മാരകത്തിലെത്തി പാർട്ടി നേതാക്കളുമായി കൂടിക്കാഴ്ച നടത്തിയ ശേഷം എൽ.ഡി.എഫ് കൺവീനർ ടി.പി. രാമകൃഷ്ണനാണ് ചർച്ചകൾ തുടരുമെന്ന് വ്യക്തമാക്കിയത്.
മാധ്യമങ്ങളോട് പരസ്യമായി പറയാൻ തക്കതായ തീരുമാനങ്ങളിലേക്ക് നിലവിൽ എത്തിയിട്ടില്ലെന്ന് ടി.പി. രാമകൃഷ്ണൻ പ്രതികരിച്ചു. പ്രതിപക്ഷ ഉപനേതാവ് സ്ഥാനത്തെച്ചൊല്ലിയുള്ള വിഷയം സി.പി.ഐ മുന്നോട്ടുവെച്ചിട്ടുണ്ടെന്നും അതിൽ സി.പി.എം തങ്ങളുടെ നിലപാട് വ്യക്തമാക്കിയിട്ടുണ്ടെന്നും അദ്ദേഹം പറഞ്ഞു.
കീഴ്വഴക്കങ്ങൾ ചൂണ്ടിക്കാട്ടി പ്രതിപക്ഷ ഉപനേതാവ് സ്ഥാനം നിലനിർത്താൻ സി.പി.എം ശ്രമിക്കുമ്പോൾ, എല്ലാ പദവികളും ഒരൊറ്റ പാർട്ടിയിലേക്ക് കേന്ദ്രീകരിക്കുന്ന രീതി മാറണമെന്നും തിരുത്തലുകൾ ആവശ്യമാണെന്നുമാണ് സി.പി.ഐയുടെ നിലപാട്.
