തൃശ്ശൂർ: ഗുരുവായൂരിൽ വീടിനുള്ളിലിരുന്ന ഫ്രിഡ്ജ് പൊട്ടിത്തെറിച്ച് കിടപ്പുരോഗികളായ ദമ്പതികൾക്ക് പരിക്കേറ്റു. ഇന്നലെ രാത്രി 11.30 ഓടെയാണ് നാടിനെ നടുക്കിയ സംഭവം ഉണ്ടായത്. അപകടത്തിൽ പരിക്കേറ്റ കുട്ടപ്പൻ (70), ഭാര്യ അംബിക (65) എന്നിവരെ ശ്വാസതടസ്സത്തെ തുടർന്ന് ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്നാണ് പ്രാഥമിക വിവരം.
രാത്രി ഉറക്കത്തിനിടയിൽ വീടിനുള്ളിൽ പുകമൂടുകയും ശ്വാസം മുട്ടൽ അനുഭവപ്പെടുകയും ചെയ്തതിനെ തുടർന്നാണ് ദമ്പതികൾ ഉണർന്നത്. ഉടൻ തന്നെ ഇവർ അയൽവാസികളെ വിളിച്ച് സഹായം അഭ്യർത്ഥിക്കുകയായിരുന്നു. നാട്ടുകാരെത്തി ഇവരെ വേഗത്തിൽ വീടിന് പുറത്തേക്ക് മാറ്റിയതുകൊണ്ട് മാത്രമാണ് വൻ ദുരന്തം ഒഴിവായത്. ഇവരെ പുറത്തെത്തിച്ചതിന് പിന്നാലെ ഫ്രിഡ്ജ് പൂർണ്ണമായും പൊട്ടിത്തെറിക്കുകയായിരുന്നു.
വൈദ്യുത ലൈനിലെ ഷോർട്ട് സർക്യൂട്ടാണ് ഫ്രിഡ്ജ് പൊട്ടിത്തെറിക്കാൻ കാരണമായതെന്നാണ് പോലീസിന്റെയും ഫയർഫോഴ്സിന്റെയും പ്രാഥമിക അനുമാനം. പൊട്ടിത്തെറിയുടെ ആഘാതത്തിൽ വീടിന്റെ ഭിത്തികൾക്ക് വിള്ളൽ വീഴുകയും ജനൽച്ചില്ലുകൾ പൂർണ്ണമായി തകരുകയും ചെയ്തിട്ടുണ്ട്. സംഭവത്തിൽ ഫയർഫോഴ്സും പോലീസും സ്ഥലത്തെത്തി കൂടുതൽ പരിശോധനകൾ നടത്തിവരികയാണ്.
