ന്യൂഡൽഹി: നീറ്റ് പരീക്ഷാ ചോദ്യപേപ്പർ ചോർച്ച വിവാദത്തിൽ പ്രതികരണവുമായി പ്രധാനമന്ത്രി നരേന്ദ്ര മോദിയും കോൺഗ്രസ് നേതാവ് രാഹുൽ ഗാന്ധിയും. രാജ്യത്ത് നടന്നത് തികച്ചും ഒരു ‘മഹാപാതക’മാണെന്നും ഉത്തരവാദികളായ ആരെയും വെറുതെ വിടില്ലെന്നും പാർലമെന്ററി പാർട്ടി യോഗത്തിൽ സംസാരിക്കവേ പ്രധാനമന്ത്രി വ്യക്തമാക്കി.
വിഷയത്തിൽ സർക്കാർ ഉടനടി നടപടിയെടുക്കുകയും കുറ്റക്കാരെ നിയമത്തിന് മുന്നിൽ കൊണ്ടുവരികയും ചെയ്തിട്ടുണ്ട്. ഭാവിയിൽ ഇത്തരത്തിലുള്ള ചോദ്യപേപ്പർ ചോർച്ചകൾ ആവർത്തിക്കാതിരിക്കാൻ എല്ലാ സംസ്ഥാന സർക്കാരുകളും ഒരുമിച്ച് പ്രവർത്തിക്കണമെന്നും അദ്ദേഹം കൂട്ടിച്ചേർത്തു.
അതേസമയം, രാജ്യത്തെ വിദ്യാഭ്യാസ-പരീക്ഷാ സമ്പ്രദായങ്ങൾ പൂർണ്ണമായും തകർന്നടിഞ്ഞിരിക്കുകയാണെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി കുറ്റപ്പെടുത്തി. വിഷയം കത്തിനിൽക്കുമ്പോഴും പ്രധാനമന്ത്രി പുലർത്തുന്ന നിശബ്ദത ചോദ്യം ചെയ്ത രാഹുൽ, അദ്ദേഹം വിദ്യാർത്ഥികളോട് ഉടനടി മാപ്പ് പറയണമെന്ന് ആവശ്യപ്പെട്ടു.
വിദ്യാർത്ഥികളുടെ ഭാഗത്തുനിന്നുള്ള പ്രതിഷേധങ്ങളും പരാതികളും തികച്ചും ന്യായമാണ്. വിദ്യാർത്ഥികൾക്ക് നേരെ നടക്കുന്ന പോലീസ് നടപടികൾ അടിയന്തരമായി അവസാനിപ്പിക്കണം. കോൺഗ്രസ് ഈ വിഷയം നിരന്തരം ഉന്നയിക്കുന്നുണ്ടെന്നും സർക്കാരിന് മുന്നിൽ പലതവണ വിഷയത്തിന്റെ വ്യാപ്തി വ്യക്തമാക്കിക്കൊടുത്തിട്ടുണ്ടെന്നും രാഹുൽ ഗാന്ധി കൂട്ടിച്ചേർത്തു.
