ലഖ്നൗ: ഉത്തർപ്രദേശിലെ ഗ്രേറ്റർ നോയ്ഡയിൽ സ്ലീപ്പർ ടൂറിസ്റ്റ് ബസിന് തീപിടിച്ച് ഒരു സ്ത്രീ ഉൾപ്പെടെ ഒൻപത് യാത്രക്കാർക്ക് ദാരുണാന്ത്യം. ബുധനാഴ്ച രാത്രി യമുന എക്സ്പ്രസ്വേയിലാണ് അപകടം നടന്നത്. നോയ്ഡയിൽ നിന്ന് ഉത്തർപ്രദേശിലെ മഹോബയിലേക്ക് 35 യാത്രക്കാരുമായി പോവുകയായിരുന്ന ബസിലാണ് പെട്ടെന്ന് തീ പടർന്നുപിടിച്ചത്.
ബസിന്റെ എയർ കണ്ടീഷനിങ് (എ.സി) സംവിധാനത്തിൽ ഉണ്ടായ ശക്തമായ പൊട്ടിത്തെറിയാണ് അപകടത്തിന് കാരണമെന്നാണ് പ്രാഥമിക നിഗമനം. പൊട്ടിത്തെറിയെ തുടർന്ന് എൻജിന്റെ ലൂബ്രിക്കേഷൻ ഓയിലിലേക്ക് തീ പടരുകയും നിമിഷങ്ങൾക്കകം ബസ് പൂർണ്ണമായി കത്തിയമരുകയുമായിരുന്നുവെന്ന് പോലീസ് വൃത്തങ്ങൾ വ്യക്തമാക്കി.
രാത്രി സമയമായതിനാൽ ബസിലുണ്ടായിരുന്ന യാത്രക്കാരിൽ ഭൂരിഭാഗവും ഉറക്കത്തിലായിരുന്നു. ഇതാണ് ദുരന്തത്തിന്റെ ആഘാതം വർദ്ധിപ്പിച്ചത്. പെട്ടെന്ന് തീ പടർന്നതോടെ യാത്രക്കാർക്ക് പുറത്തിറങ്ങാൻ കഴിഞ്ഞില്ല.
