കോഴിക്കോട്: മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിനെതിരെ രൂക്ഷവിമർശനവുമായി പിണറായി വിജയൻ. കോടതിയിൽ പരാജയപ്പെട്ട ആരോപണങ്ങൾക്ക് വീണ്ടും രാഷ്ട്രീയ വ്യാഖ്യാനം സൃഷ്ടിക്കാനാണ് ഇഡി ശ്രമിക്കുന്നതെന്ന് വാർത്താസമ്മേളനത്തിൽ അദ്ദേഹം കുറ്റപ്പെടുത്തി.
മൂന്ന് കോടതികൾ ഇതിനകം പരിശോധിച്ചു തള്ളിയ അതേ ആരോപണങ്ങളാണ് പുതിയ പേരുകളിൽ വീണ്ടും ഉയർത്തുന്നത്. ഒരേ കാര്യത്തിന് ഒരു വ്യക്തി എത്ര തവണ കോടതിയിൽ നിരപരാധിത്വം തെളിയിക്കണം എന്ന് അദ്ദേഹം ചോദിച്ചു. മകൾ വീണയുടെ കൈയിൽ നിന്ന് ഡയറി കണ്ടെത്തി എന്ന പ്രചാരണം ശുദ്ധ അസംബന്ധമാണ്. ഡയറിയിൽ പരാമർശിക്കുന്ന ‘പി. വി’ എന്നത് താനല്ലെന്ന് നേരത്തെ തന്നെ വ്യക്തമാക്കിയിട്ടുള്ളതാണ്. അന്വേഷണ ഏജൻസികൾ കുറച്ചെങ്കിലും അന്തസ്സ് കാണിക്കണമെന്നും അദ്ദേഹം ആവശ്യപ്പെട്ടു.
ഡിജിപിക്ക് നൽകിയ കത്തിലെ വിവരങ്ങൾ മാധ്യമങ്ങൾക്ക് ചോർത്തി നൽകി വാർത്ത സൃഷ്ടിക്കാനാണ് ഇഡി ശ്രമിച്ചത്. സിപിഎമ്മിനെ തകർക്കാൻ ബിജെപിയും കോൺഗ്രസും കൈകോർത്തിരിക്കുകയാണ്. തനിക്കെതിരായ ഇഡിയുടെ നീക്കം പാർട്ടിക്ക് മേൽ രാഷ്ട്രീയ അജണ്ട അടിച്ചേൽപ്പിക്കാൻ വേണ്ടിയുള്ളതാണ്.
പാർട്ടി സെക്രട്ടറിയാകുന്നതിന് മുൻപ് മുതൽ തന്നെ തുടർച്ചയായ മനുഷ്യത്വരഹിതമായ ആക്രമണങ്ങൾക്ക് ഇരയായിട്ടുണ്ടെന്ന് പിണറായി വിജയൻ ഓർമ്മിപ്പിച്ചു. 2016-ൽ അധികാരത്തിൽ വന്നപ്പോഴും സമാനമായ കടന്നാക്രമണങ്ങൾ നേരിടേണ്ടി വന്നു. സിപിഎമ്മിനെ തകർത്തു കളയാമെന്നത് ചിലരുടെ വെറും ദുർമോഹം മാത്രമാണെന്നും അത്തരം ശ്രമങ്ങൾ നടത്തുന്നവരോട് സഹതാപം മാത്രമാണുള്ളതെന്നും അദ്ദേഹം കൂട്ടിച്ചേർത്തു.
