സ്റ്റോക്‌ഹോം: 2026-ലെ സാമ്പത്തികശാസ്ത്രത്തിനുള്ള നോബൽ പുരസ്‌കാരം അമേരിക്കൻ സാമ്പത്തികശാസ്ത്രജ്ഞരായ റോബർട്ട് ഇ.ഹാൾ, മൈക്കിൾ വുഡ്‌ഫോർഡ് എന്നിവർക്ക് ലഭിച്ചു. സാമ്പത്തിക സുസ്ഥിരതയുടെ മൈക്രോ ഇക്കണോമിക് അടിത്തറകളെക്കുറിച്ചുള്ള (microeconomic foundations of macroeconomic stabilisation) നിർണായക പഠനങ്ങൾക്കാണ് ഇരുവരെയും പുരസ്‌കാരത്തിനായി തിരഞ്ഞെടുത്തത്. കേന്ദ്ര ബാങ്കുകൾക്കും സർക്കാരുകൾക്കും സാമ്പത്തിക പ്രതിസന്ധികളെയും ആഘാതങ്ങളെയും കൂടുതൽ കൃത്യതയോടെയും കാര്യക്ഷമതയോടെയും നേരിടാൻ സഹായിക്കുന്ന നിലവിലെ സാമ്പത്തിക നയരൂപീകരണ മാതൃകകൾക്ക് സുസ്ഥിരമായ സിദ്ധാന്ത അടിത്തറ പാകാൻ ഇവരുടെ ഗവേഷണങ്ങൾക്കായി.
ഊർജ പ്രതിസന്ധി, ഗാർഹിക ഉപഭോഗത്തിലുണ്ടാകുന്ന പെട്ടെന്നുള്ള വ്യതിയാനങ്ങൾ തുടങ്ങിയ അപ്രതീക്ഷിത സാമ്പത്തിക ആഘാതങ്ങൾ നേരിടുമ്പോൾ, വിപണിയും ഉപഭോക്താക്കളും എങ്ങനെയൊക്കെ പ്രതികരിക്കുന്നുവെന്ന് മനസ്സിലാക്കാൻ ഇവരുടെ സാമ്പത്തിക സിദ്ധാന്തങ്ങൾ സഹായിച്ചതായി നോബൽ പുരസ്‌കാര സമിതി വിലയിരുത്തി. പണപ്പെരുപ്പവും സാമ്പത്തിക മാന്ദ്യവും പ്രതിരോധിക്കാൻ മോണിറ്ററി, ഫിസ്കൽ നയങ്ങൾ എപ്പോൾ, എങ്ങനെ നടപ്പിലാക്കണമെന്ന് കൃത്യമായി നിശ്ചയിക്കാൻ ഇത് വഴി സാധിക്കുന്നു. കാലിഫോർണിയയിലെ സ്റ്റാൻഫോർഡ് സർവകലാശാലയിലെ പ്രൊഫസറാണ് റോബർട്ട് ഇ. ഹാൾ. ന്യൂയോർക്കിലെ കൊളംബിയ സർവകലാശാലയിലാണ് മൈക്കിൾ വുഡ്‌ഫോർഡ് സേവനമനുഷ്ഠിക്കുന്നത്.
