ന്യൂഡൽഹി: നീറ്റ് യു.ജി (NEET-UG) പരീക്ഷാ ചോർച്ചയുമായി ബന്ധപ്പെട്ട് രാജ്യവ്യാപകമായി പ്രതിഷേധം ആളിപ്പടരുന്നതിനിടെ, കേന്ദ്ര സർക്കാരിനെയും പരീക്ഷാ നടത്തിപ്പിനെയും രൂക്ഷമായി വിമർശിച്ച് തമിഴ്നാട് മുൻ ബി.ജെ.പി നേതാവ് കെ. അണ്ണാമലൈ. കഴിഞ്ഞ അഞ്ച് വർഷത്തിനിടെ മൂന്ന് തവണയാണ് നീറ്റ് ചോദ്യപേപ്പർ ചോർന്നതെന്നും എന്നാൽ ഇതിന്റെ ഉത്തരവാദിത്തം ഏറ്റെടുക്കാൻ ആരും തയ്യാറാകുന്നില്ലെന്നും അദ്ദേഹം കുറ്റപ്പെടുത്തി.
മെഡിക്കൽ പ്രവേശനത്തിന് രാജ്യത്താകെ ഏകീകൃത സ്വഭാവം കൊണ്ടുവരാനും പിന്നാക്ക വിഭാഗങ്ങളിലെ സമർത്ഥരായ വിദ്യാർത്ഥികൾക്ക് ഡോക്ടറാകാനുള്ള തുല്യ അവസരം ഉറപ്പാക്കാനും നീറ്റ് സഹായിക്കുമെന്ന് കരുതി മുൻപ് താൻ ഈ പരീക്ഷയെ ശക്തമായി പിന്തുണച്ചിരുന്നതായി അണ്ണാമലൈ എക്സിൽ (X) കുറിച്ചു. എന്നാൽ, തുടർച്ചയായുണ്ടാകുന്ന ചോദ്യപേപ്പർ ചോർച്ച വിദ്യാർത്ഥികളിൽ വലിയ മാനസിക സമ്മർദ്ദമാണ് ഉണ്ടാക്കുന്നത്. പരീക്ഷാ സംവിധാനത്തിലുള്ള വിശ്വാസം പൂർണ്ണമായും നഷ്ടപ്പെട്ടപ്പോഴാണ് വിദ്യാർത്ഥികൾ തെരുവിലിറങ്ങി പ്രതിഷേധിക്കാൻ നിർബന്ധിതരായതെന്ന് അദ്ദേഹം ചൂണ്ടിക്കാട്ടി.
“പ്രതിഷേധങ്ങൾ ഒരു ഫ്ലാഷ് പോയിന്റിൽ എത്തുന്നതുവരെ കേന്ദ്ര സർക്കാർ എന്തിനാണ് കാത്തിരുന്നത്? സമരം ചെയ്യുന്ന വിദ്യാർത്ഥികളുമായി ചർച്ച നടത്താൻ സർക്കാർ ഇത്രയും വൈകിയത് എന്തുകൊണ്ടാണ്?” എന്ന് അദ്ദേഹം ചോദിച്ചു. വിദ്യാഭ്യാസ സ്ഥാപനങ്ങളിലുള്ള വിശ്വാസം യുവതലമുറയ്ക്ക് നഷ്ടപ്പെടുന്നത് രാജ്യത്തിന്റെ ഭാവിയെത്തന്നെ ദോഷകരമായി ബാധിക്കും.
ജനാധിപത്യത്തിൽ പ്രതിഷേധിക്കാനുള്ള അവകാശം മൗലികമാണെന്ന് വ്യക്തമാക്കിയ അണ്ണാമലൈ, വിദ്യാർത്ഥികളുടെ ന്യായമായ സമരത്തെ നിക്ഷിപ്ത താല്പര്യക്കാർ ദുരുപയോഗം ചെയ്യാതിരിക്കാൻ സമരക്കാർ പ്രത്യേക ജാഗ്രത പുലർത്തണമെന്നും മുന്നറിയിപ്പ് നൽകി.
