തിരുവനന്തപുരം: സംസ്ഥാനത്തെ വിവിധ തദ്ദേശ സ്വയംഭരണ സ്ഥാപനങ്ങളിലെ 38 വാർഡുകളിലേക്ക് ഉപതിരഞ്ഞെടുപ്പ് തീയതി പ്രഖ്യാപിച്ചു. സെപ്റ്റംബർ 28-നാണ് വോട്ടെടുപ്പ് നടക്കുക. സെപ്റ്റംബർ 29-ന് ഫലപ്രഖ്യാപനം ഉണ്ടാകും. തിരഞ്ഞെടുപ്പ് പ്രഖ്യാപിച്ചതോടെ ചൊവ്വാഴ്ച മുതൽ ബന്ധപ്പെട്ട പ്രദേശങ്ങളിൽ മാതൃകാ പെരുമാറ്റച്ചട്ടം നിലവിൽ വന്നു.
തിരഞ്ഞെടുപ്പിനുള്ള ഔദ്യോഗിക വിജ്ഞാപനം വ്യാഴാഴ്ച പുറപ്പെടുവിക്കും. സെപ്റ്റംബർ 10 വരെ നാമനിർദേശ പത്രികകൾ സമർപ്പിക്കാം. സൂക്ഷ്മപരിശോധന സെപ്റ്റംബർ 11-നും പത്രിക പിൻവലിക്കാനുള്ള അവസാന തീയതി സെപ്റ്റംബർ 14-നുമാണ്.
എറണാകുളം, കോഴിക്കോട് ജില്ലകളിലെ രണ്ട് കോർപറേഷൻ വാർഡുകൾ, തൃശ്ശൂർ, പാലക്കാട്, കണ്ണൂർ ജില്ലകളിലെ മൂന്ന് മുൻസിപ്പാലിറ്റി വാർഡുകൾ, തിരുവനന്തപുരം, കോട്ടയം, പാലക്കാട് ജില്ലകളിലെ മൂന്ന് ജില്ലാ പഞ്ചായത്ത് വാർഡുകൾ, ഏഴ് ബ്ലോക്ക് പഞ്ചായത്ത് വാർഡുകൾ, 23 ഗ്രാമപഞ്ചായത്ത് വാർഡുകൾ എന്നിവിടങ്ങളിലേക്കാണ് ഉപതിരഞ്ഞെടുപ്പ് നടക്കുന്നത്.
കഴിഞ്ഞ തദ്ദേശ തിരഞ്ഞെടുപ്പിലും അതിനുശേഷം നടന്ന നിയമസഭാ തിരഞ്ഞെടുപ്പിലും മികച്ച മുന്നേറ്റം നടത്താൻ കഴിഞ്ഞതിന്റെ ആത്മവിശ്വാസത്തിൽ വിജയം തുടരാനാണ് യുഡിഎഫ് ലക്ഷ്യമിടുന്നത്. എന്നാൽ തിരിച്ചടികളിൽ നിന്ന് കരകയറി ശക്തമായ തിരിച്ചുവരവ് നടത്താനും തങ്ങളുടെ സ്വാധീനം വ്യക്തമാക്കാനുമുള്ള ഒരുക്കങ്ങളിലാണ് എൽഡിഎഫ്.
