ന്യൂഡൽഹി: നീറ്റ് പരീക്ഷയിലെ ക്രമക്കേടുകൾക്കെതിരെ 26 ദിവസമായി തുടർന്നുപോന്ന നിരാഹാര സമരം സോനം വാങ്ചുക് അവസാനിപ്പിച്ചു. ഗുരുഗ്രാമിലെ മേദാന്ത ആശുപത്രിയിൽ വെച്ച് വെള്ളിയാഴ്ച പുലർച്ചെ ഒന്നിനുശേഷമാണ് കേന്ദ്രമന്ത്രിമാരായ ജെ.പി. നദ്ദ, ജിതേന്ദ്ര സിംഗ് എന്നിവരുടെ സാന്നിധ്യത്തിൽ അദ്ദേഹം ഉപവാസം അവസാനിപ്പിച്ചത്.
പാര്ലമെന്റ് മാര്ച്ചില് പങ്കെടുത്തവര്ക്കെതിരെ കേസ് എടുക്കില്ലെന്ന് കേന്ദ്രം സോനം വാങ്ചുക്കിന് ഉറപ്പുനല്കിയെന്നാണ് റിപ്പോര്ട്ടുകള്. നീണ്ട ചര്ച്ചകള്ക്കൊടുവില് താന് നിരാഹാരസമരം അവസാനിപ്പിക്കുകയാണെന്ന് സോനം എക്സിൽ(ട്വിറ്ററില്) കുറിച്ചു. ആശുപത്രിയില് നിന്നുള്ള ചിത്രങ്ങളും അദ്ദേഹം പങ്കുവച്ചു.
ആരോഗ്യനില മോശമായതിനെ തുടർന്ന് മേദാന്ത ആശുപത്രിയിലേക്ക് മാറ്റിയ വാങ്ചുക്കിനെ സന്ദർശിച്ച് ആഭ്യന്തര മന്ത്രി അമിത് ഷായുടെ നിർദ്ദേശപ്രകാരമാണ് കേന്ദ്രമന്ത്രിമാർ ഒത്തുതീർപ്പിലെത്തിയത്. വാർത്തകൾക്ക് പിന്നാലെ വിദ്യാഭ്യാസ മന്ത്രാലയത്തിൽ സെക്രട്ടറി തലത്തിലുള്ള വലിയ അഴിച്ചുപണിയും കേന്ദ്രസർക്കാർ നടത്തിക്കഴിഞ്ഞു.
സമരം പടർന്നുപിടിച്ച സാഹചര്യത്തിൽ, വിഷയത്തിൽ അടിയന്തര തീരുമാനങ്ങളുണ്ടാകുമെന്ന് പ്രധാനമന്ത്രി നരേന്ദ്ര മോദി വീഡിയോ സന്ദേശത്തിലൂടെ അറിയിച്ചു. പരീക്ഷാ തട്ടിപ്പുകൾ തടയാൻ കടുത്ത വ്യവസ്ഥകളുള്ള പുതിയ നിയമനിർമ്മാണത്തിനും ഫാസ്റ്റ് ട്രാക്ക് കോടതികൾ സ്ഥാപിക്കുന്നതിനും സർക്കാർ നീക്കം തുടങ്ങി.
