തിരുവനന്തപുരം: സംസ്ഥാനത്തെ ജില്ലാ, ജനറൽ ആശുപത്രികളിൽ 24 മണിക്കൂറും സ്പെഷ്യാലിറ്റി ചികിത്സാ സൗകര്യം ഉറപ്പാക്കുന്നതിനുള്ള സമഗ്ര പദ്ധതിക്ക് ആരോഗ്യവകുപ്പ് തുടക്കമിടുന്നു.
ഇതിന്റെ പരീക്ഷണാടിസ്ഥാനത്തിലുള്ള ആദ്യ ഘട്ടം ചൊവ്വാഴ്ച പുനലൂർ ജനറൽ ആശുപത്രിയിൽ ആരംഭിക്കും. അടുത്ത ആറു മാസത്തിനുള്ളിൽ പദ്ധതി സംസ്ഥാനത്തുടനീളം വ്യാപിപ്പിക്കാനാണ് ലക്ഷ്യമിടുന്നത്.
പ്രാഥമിക, കുടുംബാരോഗ്യ കേന്ദ്രങ്ങളിൽ സേവനമനുഷ്ഠിക്കുന്ന പി.ജി. യോഗ്യതയുള്ള അസിസ്റ്റന്റ് സർജന്മാരെ ജില്ലാ, ജനറൽ ആശുപത്രികളിലേക്ക് മാറ്റിനിയമിക്കും. ഇത്തരത്തിൽ മാറ്റിനിയമിക്കപ്പെടുന്ന ഡോക്ടർമാർക്ക് പ്രത്യേക അലവൻസ് നൽകുന്നത് പരിഗണനയിലാണ്. പുനർവിന്യാസ നടപടികൾ ഡോക്ടർമാരുടെ സമ്മതത്തോടെയായിരിക്കും നടത്തുക.
ഡോക്ടർമാരുടെ പുനർവിന്യാസം മൂലം പ്രാഥമിക കേന്ദ്രങ്ങളിലുണ്ടാകുന്ന ഒഴിവുകളിലേക്ക് കരാർ അടിസ്ഥാനത്തിൽ താൽക്കാലിക നിയമനം നടത്തും. ഇതിനകം 140 പേർക്ക് നിയമന ഉത്തരവ് നൽകിക്കഴിഞ്ഞു. ഇതിനുപുറമേ സ്ഥിരം നിയമന നടപടികളും വേഗത്തിലാക്കുമെന്ന് ആരോഗ്യവകുപ്പ് അറിയിച്ചു.
രാവിലെ 8:00 മുതൽ രാത്രി 8:00 വരെ ഒൻപത് സ്പെഷ്യലിസ്റ്റ് ഡോക്ടർമാരുടെ സേവനം നേരിട്ട് ലഭ്യമാകും. രാത്രി 8:00 മണിക്ക് ശേഷം അത്യാവശ്യ ഘട്ടങ്ങളിൽ ഉപയോഗപ്പെടുത്താൻ ഓൺകോൾ (On-call) സംവിധാനവും ഏർപ്പെടുത്തും.
സാധാരണക്കാർക്ക് താലൂക്ക്, ജില്ലാ തലങ്ങളിൽ തന്നെ വിദഗ്ധ ചികിത്സ തടസ്സമില്ലാതെ ലഭ്യമാക്കുക എന്ന ലക്ഷ്യത്തോടെയാണ് പുതിയ പരിഷ്കാരം നടപ്പിലാക്കുന്നത്.
