ന്യൂയോർക്ക്: അമേരിക്കൻ പ്രസിഡന്റായി അധികാരമേറ്റതിനുശേഷം ഇന്ത്യയും പാകിസ്താനും തമ്മിലുള്ള രൂക്ഷമായ സംഘർഷം ഉൾപ്പെടെ എട്ടോളം അന്താരാഷ്ട്ര യുദ്ധങ്ങളും തർക്കങ്ങളും താൻ ഇടപെട്ട് പരിഹരിച്ചതായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഐക്യരാഷ്ട്രസഭയുടെ (യുഎൻ) പൊതുസഭയെ അഭിസംബോധന ചെയ്ത് സംസാരിക്കവേയാണ് ട്രംപ് ഈ അവകാശവാദം ഉന്നയിച്ചത്.
ട്രംപിന്റെ സമയോചിതമായ ഇടപെടൽ കാരണം മൂന്ന് കോടിയോളം ആളുകളുടെ ജീവൻ രക്ഷിക്കാൻ സാധിച്ചുവെന്ന് വ്യക്തമാക്കി പാകിസ്താൻ പ്രധാനമന്ത്രി തനിക്ക് പ്രത്യേക നന്ദിക്കത്ത് അയച്ചതായും ട്രംപ് പ്രസംഗത്തിൽ എടുത്തുപറഞ്ഞു. രാജ്യങ്ങൾ തമ്മിലുള്ള ശക്തമായ വ്യക്തിബന്ധങ്ങൾ, വ്യാപാര നയങ്ങൾ, താരിഫുകൾ എന്നിവ ഫലപ്രദമായി ഉപയോഗിച്ചാണ് താൻ ഇത്തരം വൻകിട സമാധാന കരാറുകളിൽ എത്തിയതെന്ന് അദ്ദേഹം വ്യക്തമാക്കി.
