ഡൽഹി: ഫ്ലൈ ദുബായ് വിമാനത്തിലുണ്ടായ ആക്രമണത്തിനിടെ സ്വന്തം ജീവൻ പണയം വെച്ച് 174 യാത്രക്കാരുടെ ജീവൻ രക്ഷിച്ച മലയാളി പൈലറ്റ് സ്മിത്ത് മച്ചാറുമായി പ്രധാനമന്ത്രി നരേന്ദ്ര മോദി ഫോണിൽ സംസാരിച്ചു.
ആശുപത്രി കിടക്കയിൽ ചികിത്സയിൽ കഴിയുന്ന സ്മിത്തുമായി വീഡിയോ കോളിലൂടെ സംസാരിച്ച പ്രധാനമന്ത്രി, അദ്ദേഹത്തിന്റെ ധീരമായ പ്രവർത്തനത്തെയും മനസ്സാന്നിധ്യത്തെയും പ്രശംസിച്ചു.
സംഭവ സമയത്ത് മരണത്തെ മുന്നിൽ കണ്ട നിമിഷങ്ങളെക്കുറിച്ചും, ക്രൂരമായ കത്തിക്കുത്തിൽ ഗുരുതരമായി പരിക്കേറ്റിട്ടും കോക്പിറ്റിന്റെ വാതിൽ അടച്ചുപൂട്ടി യാത്രക്കാരെയും വിമാനത്തെയും സുരക്ഷിതമാക്കാൻ നടത്തിയ ശ്രമങ്ങളെക്കുറിച്ചും സ്മിത്ത് പ്രധാനമന്ത്രിയോട് വിശദീകരിച്ചു.
തന്റെ ആരോഗ്യം മെച്ചപ്പെടുന്നുണ്ടെന്നും രാജ്യത്തിന്റെ പ്രധാനമന്ത്രിയുമായി നേരിട്ട് സംസാരിക്കാൻ സാധിച്ചത് വലിയ ആശ്വാസവും സന്തോഷവും നൽകുന്നുണ്ടെന്നും സ്മിത്ത് പ്രതികരിച്ചു.
മറ്റുള്ളവരുടെ ജീവനെടുക്കുന്നവരല്ല, മറിച്ച് തങ്ങളുടെ ജീവൻ നൽകിയും മറ്റുള്ളവരെ സംരക്ഷിക്കുന്നവരാണ് ഇന്ത്യക്കാരെന്ന് ലോകത്തിന് മുന്നിൽ തെളിയിക്കാൻ സ്മിത്തിന്റെ ഈ ധീരതയിലൂടെ സാധിച്ചെന്ന് പ്രധാനമന്ത്രി പറഞ്ഞു.
സ്മിത്ത് ഒരു ‘യഥാർത്ഥ ഹീറോ’യാണെന്ന് വിശേഷിപ്പിച്ച അദ്ദേഹം, മുൻദിവസം സ്മിത്തിന്റെ കുടുംബാംഗങ്ങളുമായി സംസാരിച്ച് എല്ലാവിധ നയതന്ത്ര സഹായങ്ങളും ഉറപ്പുനൽകിയിരുന്നതായും വ്യക്തമാക്കി.
