ന്യൂഡൽഹി: പാർലമെന്റിന്റെ വർഷകാല സമ്മേളനത്തിന് ഇന്ന് തുടക്കമാകും. വരും ദിവസങ്ങളിൽ നിർണായകമായ പല നിയമനിർമ്മാണങ്ങൾക്കും സഭ സാക്ഷ്യം വഹിക്കുമെന്നാണ് കരുതപ്പെടുന്നത്.
എഫ്.സി.ആർ.എ. ബിൽ ഉൾപ്പെടെയുള്ള പ്രധാന ബില്ലുകൾ പാസാക്കിയെടുക്കുക എന്ന ലക്ഷ്യത്തോടെയാണ് കേന്ദ്രസർക്കാർ സമ്മേളനത്തെ സമീപിക്കുന്നത്.വന്ദേമാതരത്തോട് അനാദരം കാട്ടിയാൽ അത് കുറ്റകൃത്യമായി കണക്കാക്കുന്ന ബില്ലും, ജനന-മരണ രജിസ്ട്രേഷനുകൾ വൈകിയാൽ നൽകേണ്ട ശിക്ഷാനടപടികൾ കൂടുതൽ കർശനമാക്കുന്ന ബില്ലും ഈ സമ്മേളനത്തിൽ സർക്കാർ സഭയുടെ പരിഗണനയ്ക്ക് കൊണ്ടു വരും.
അതേസമയം, കേന്ദ്രസർക്കാരിനെ വിവിധ വിഷയങ്ങളിൽ കടന്നാക്രമിക്കാൻ തന്നെയാണ് പ്രതിപക്ഷത്തിന്റെ തീരുമാനം. ചോദ്യപ്പേപ്പർ ചോർച്ച, അയോധ്യ സംഭാവനക്കൊള്ള, വർധിച്ചു വരുന്ന ഇന്ധനവില എന്നിവ പ്രധാന ആയുധങ്ങളാക്കി സഭയിൽ പ്രതിഷേധം ശക്തമാക്കാൻ പ്രതിപക്ഷ പാർട്ടികൾ നീക്കം ആരംഭിച്ചു. കൂടാതെ, ഡൽഹിയിൽ നടക്കുന്ന വിദ്യാർഥി പ്രക്ഷോഭത്തിന്റെയും നിരാഹാര സത്യാഗ്രഹത്തിന്റെയും അലയൊലികൾ ആദ്യദിനം മുതൽ തന്നെ സഭാനടപടികളെ ബാധിക്കാനിടയുണ്ട്.
എന്നാൽ, പ്രതിപക്ഷ നിരയിലെ സമീപകാലത്തെ ആഭ്യന്തര ഭിന്നതകൾ ഭരണപക്ഷമായ എൻ.ഡി.എ.ക്ക് ആശ്വാസം പകരുന്നതാണ്. തൃണമൂൽ കോൺഗ്രസിലെ ഭിന്നതയും, ശിവസേന ഉദ്ധവ് പക്ഷത്തുനിന്നും ആറ് എം.പി.മാർ എക്നാഥ് ഷിൻഡേ പക്ഷത്തേക്ക് ചേക്കേറിയതും പ്രതിപക്ഷ കൂട്ടായ്മയുടെ ആക്രമണ വീര്യം കുറയ്ക്കുമെന്നാണ് ഭരണപക്ഷത്തിന്റെ പ്രതീക്ഷ.
