ന്യൂഡൽഹി: രാജ്യത്ത് വരാനിരിക്കുന്ന ജനസംഖ്യാ കണക്കെടുപ്പിനായുള്ള (സെൻസസ്) ഔദ്യോഗിക ചോദ്യാവലി കേന്ദ്ര സർക്കാർ വിജ്ഞാപനം ചെയ്തു. പൗരന്മാരിൽ നിന്ന് വിവരങ്ങൾ ശേഖരിക്കുന്നതിനായി ആകെ 40 ചോദ്യങ്ങളാണ് പുതിയ പട്ടികയിൽ ഉൾപ്പെടുത്തിയിരിക്കുന്നത്. 1948-ലെ സെൻസസ് ആക്ട് അനുസരിച്ച് രജിസ്ട്രാർ ജനറൽ മൃത്യുഞ്ജയ് കുമാർ നാരായൺ ആണ് വിജ്ഞാപനം പുറപ്പെടുവിച്ചത്.
ചരിത്രത്തിലാദ്യമായി ഇത്തവണത്തെ സെൻസസിൽ പൗരന്മാരുടെ ജാതി വിവരങ്ങൾ കൂടി ശേഖരിക്കും എന്നതാണ് ഏറ്റവും ശ്രദ്ധേയമായ മാറ്റം. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കാബിനറ്റ് കമ്മിറ്റി ഓൺ പൊളിറ്റിക്കൽ അഫയേഴ്സ് ആണ് ജാതി വിവരങ്ങൾ ഉൾപ്പെടുത്താൻ തീരുമാനമെടുത്തത്.
പൂർണ്ണമായും ഡിജിറ്റൽ സംവിധാനത്തിലൂടെ നടക്കുന്ന ഇത്തവണത്തെ കണക്കെടുപ്പിൽ എന്യൂമറേറ്റർമാർ മുൻകൂട്ടി തയ്യാറാക്കിയ ജാതി പട്ടിക കൊണ്ടുപോകില്ല. മറിച്ച്, പൗരന്മാർ സ്വയം നൽകുന്ന വിവരങ്ങളുടെ അടിസ്ഥാനത്തിലാകും ജാതി രേഖപ്പെടുത്തുക.
സെൻസസ് ചോദ്യാവലിയിൽ ഉൾപ്പെടുത്തിയിട്ടുള്ള പ്രധാന മേഖലകൾ താഴെ പറയുന്നവയാണ്:
വ്യക്തിഗത വിവരങ്ങൾ: പേര്, വയസ്സ്, വൈവാഹിക നില, വിവാഹ സമയം, ദേശീയത, മതം, മാതാപിതാക്കളുടെ വിവരങ്ങൾ, ഭിന്നശേഷി.
ഭാഷയും സാക്ഷരതയും: മാതൃഭാഷ, മറ്റ് അറിയാവുന്ന ഭാഷകൾ, അക്ഷരാഭ്യാസവും ഡിജിറ്റൽ സാക്ഷരതയും.
തൊഴിലും വിദ്യാഭ്യാസവും: വിദ്യാഭ്യാസ യോഗ്യത, പഠിച്ച മേഖല, തൊഴിൽ വിവരങ്ങൾ, തൊഴിലില്ലായ്മ, ജോലിസ്ഥലത്തേക്കുള്ള യാത്രാരീതി.
സ്ത്രീകളുടെ വിവരങ്ങൾ: നിലവിൽ വിവാഹിതരായവർ, വിധവകൾ, വിവാഹബന്ധം വേർപെടുത്തിയവർ എന്നിവരിൽ നിന്നുള്ള കുട്ടികളുടെ എണ്ണവും കഴിഞ്ഞ ഒരു വർഷത്തിനിടെ ജനിച്ച കുട്ടികളുടെ വിവരങ്ങളും.
മറ്റു വിവരങ്ങൾ: കോവിഡ്-19 വാക്സിൻ സ്വീകരിച്ച കേന്ദ്രം, ബാങ്ക് അക്കൗണ്ടുകളുടെ എണ്ണം, മൊബൈൽ നമ്പർ, പാസ്പോർട്ട് നമ്പർ, ഡ്രൈവിംഗ് ലൈസൻസ് വിവരങ്ങൾ, പ്രവാസം തുടങ്ങിയവ.
ലഡാക്ക്, ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ് തുടങ്ങിയ മഞ്ഞുവീഴ്ചയുള്ള പ്രദേശങ്ങളിൽ സെപ്റ്റംബർ 1 മുതൽ 30 വരെ വിവരശേഖരണം നടക്കും. മഞ്ഞുവീഴ്ചയുള്ള മേഖലകളിലുള്ളവർക്ക് ഓഗസ്റ്റ് 17 മുതൽ 31 വരെ പൊതുജനങ്ങൾക്ക് വിവരങ്ങൾ ഓൺലൈനായി സ്വയം നൽകാനുള്ള (Self Enumeration) സൗകര്യം ലഭ്യമാകും.
രാജ്യത്തിന്റെ മറ്റ് ഭാഗങ്ങളിൽ അടുത്ത വർഷമായിരിക്കും പ്രധാന ജനസംഖ്യാ കണക്കെടുപ്പ് ആരംഭിക്കുക.
സെൻസസിന്റെ ആദ്യ ഘട്ടമായ വീടുകളുടെ പട്ടിക തയ്യാറാക്കലും ഭവന സെൻസസും ഏപ്രിൽ 16-ന് ആരംഭിച്ചിരുന്നു. ഇത് സെപ്റ്റംബർ 30 വരെ തുടരും.
