മുംബൈ: അറബിക്കടലിൽ ലക്ഷദ്വീപിന് പടിഞ്ഞാറുഭാഗത്തായി ഇന്ത്യൻ കോസ്റ്റ് ഗാർഡും ഗുജറാത്ത് ഭീകരവിരുദ്ധ സ്ക്വാഡും (ATS) സംയുക്തമായി നടത്തിയ ഓപ്പറേഷനിൽ അന്താരാഷ്ട്ര വിപണിയിൽ 3,000 കോടിയിലധികം രൂപ വിലമതിക്കുന്ന നിരോധിത മയക്കുമരുന്ന് പിടിച്ചെടുത്തു. 526 കിലോഗ്രാം ഹെറോയിനും മെത്താംഫെറ്റാമൈനുമാണ് സുരക്ഷാ ഏജൻസികൾ പിടിച്ചെടുത്തത്.
ലഹരിമരുന്ന് കടത്താൻ ഉപയോഗിച്ച ഇറാനിയൻ പായ്ക്കപ്പലും (Dhow) ഇതിലുണ്ടായിരുന്ന അഞ്ച് പാകിസ്താൻ സ്വദേശികളെയും ഉദ്യോഗസ്ഥർ കസ്റ്റഡിയിലെടുത്തു.
ലഹരിക്കടത്തിനെക്കുറിച്ച് ലഭിച്ച കൃത്യമായ രഹസ്യാന്വേഷണ വിവരത്തിന്റെ അടിസ്ഥാനത്തിൽ ആകാശമാർഗ്ഗവും കടൽമാർഗ്ഗവും ദിവസങ്ങളോളം നടത്തിയ തീവ്ര നിരീക്ഷണത്തിനൊടുവിലാണ് സെപ്റ്റംബർ 25-ന് കോസ്റ്റ് ഗാർഡ് സംശയസ്പദമായ ബോട്ട് കണ്ടെത്തി പിന്തുടർന്ന് പിടികൂടിയത്. ഇന്ത്യൻ കോസ്റ്റ് ഗാർഡും ഗുജറാത്ത് എ.ടി.എസ്സും തമ്മിലുള്ള മികച്ച ഏകോപനമാണ് ഈ വൻ ദൗത്യത്തിന്റെ വിജയത്തിന് പിന്നിൽ പ്രവർത്തിച്ചത്.
പിടിച്ചെടുത്ത ഇറാനിയൻ ബോട്ടും മയക്കുമരുന്നും കസ്റ്റഡിയിലായ അഞ്ച് പാകിസ്താനി പൗരന്മാരെയും തുടർ ചോദ്യം ചെയ്യലിനും നിയമനടപടികൾക്കുമായി മുംബൈ തുറമുഖത്തേക്ക് എത്തിച്ചിട്ടുണ്ട്.
