കോട്ടയം: ബിജെപിയിലെ തിരഞ്ഞെടുപ്പ് ഫണ്ട് തർക്കങ്ങൾക്കിടെ, പൂഞ്ഞാർ മണ്ഡലത്തിലെ പ്രചാരണ ചെലവുകൾ പരസ്യമാക്കി മുൻ സ്ഥാനാർഥി പി.സി. ജോർജ്. പാർട്ടി യോഗത്തിൽ വച്ചാണ് ഫണ്ട് വിനിയോഗത്തിൽ വലിയ തിരിമറികൾ നടന്നിട്ടുണ്ടെന്ന ഗുരുതര ആരോപണം അദ്ദേഹം ഉന്നയിച്ചത്.
പ്രചാരണത്തിനായി ആകെ നാലര കോടിയോളം രൂപയാണ് ബിജെപി അനുവദിച്ചതെന്നും, ഈ തുകയുടെ പൂർണ ചുമതല സജി കുരിക്കാടിനാണ് നൽകിയിരുന്നതെന്നും ജോർജ് വ്യക്തമാക്കി.
താൻ ഇതിൽ നിന്നും ഒരു രൂപ പോലും കൈപ്പറ്റിയിട്ടില്ലെന്ന് വ്യക്തമാക്കിയ അദ്ദേഹം, തിരഞ്ഞെടുപ്പിന് ശേഷം സമർപ്പിച്ച 4.45 കോടി രൂപയുടെ കണക്കുകൾ പാർട്ടി പ്രവർത്തകർക്ക് തന്നെ നാണംകെടുത്തുന്നതാണെന്നും കുറ്റപ്പെടുത്തി.
ഓരോ ബൂത്തിലും 31,000 രൂപ വീതം എത്തിക്കാൻ കർശന നിർദേശമുണ്ടായിരുന്നെങ്കിലും പല ബൂത്ത് പ്രസിഡന്റുമാർക്കും ഈ തുക ലഭിച്ചിട്ടില്ലെന്ന് അന്വേഷണത്തിൽ വ്യക്തമായതായി അദ്ദേഹം പറഞ്ഞു.
താൻ സ്വതന്ത്രനായി മത്സരിച്ചപ്പോൾ അയ്യായിരത്തിലധികം വോട്ടിന്റെ ഭൂരിപക്ഷം ലഭിച്ച പ്രദേശങ്ങളിൽ പോലും പാർട്ടി സ്ഥാനാർഥിയായപ്പോൾ വോട്ടുകൾ അൻപതിൽ താഴെയായി ചുരുങ്ങി. ഫണ്ട് വിതരണത്തിൽ വന്ന വീഴ്ചയാണ് ഇതിന് കാരണമായത്.
ഈ സാഹചര്യത്തിൽ അനുവദിച്ച പണം എവിടെപ്പോയി എന്ന് പ്രവർത്തകർ സ്വയം ചിന്തിക്കണമെന്നും, തൽക്കാലം ഈ വിഷയത്തിൽ കൂടുതൽ പ്രതികരിക്കാതെ മിണ്ടാതിരിക്കുക മാത്രമാണ് ഏക വഴിയെന്നും ജോർജ് കൂട്ടിച്ചേർത്തു.
