ആലപ്പുഴ: സംസ്ഥാനത്തെ സർക്കാർ ആശുപത്രികളിലെ സൗജന്യ ഭക്ഷണ വിതരണത്തിന് പുതിയ നിയമാവലിയുമായി ആരോഗ്യവകുപ്പ്.
ആശുപത്രി പരിസരങ്ങളിൽ ബാനറും കൊടിയും കെട്ടി ഭക്ഷണം വിതരണം ചെയ്യുന്നത് അനുവദിക്കില്ലെന്നും, ഇതിന് പകരമായി ‘കമ്മ്യൂണിറ്റി കിച്ചൻ’ സംവിധാനം നടപ്പിലാക്കുമെന്നും ആരോഗ്യമന്ത്രി കെ. മുരളീധരൻ പ്രഖ്യാപിച്ചു.
കമ്മ്യൂണിറ്റി കിച്ചൻ വഴിയുള്ള ഭക്ഷണ വിതരണ പദ്ധതി ആദ്യം ആലപ്പുഴ മെഡിക്കൽ കോളേജിൽ നടപ്പാക്കുമെന്നും മന്ത്രി വാർത്താസമ്മേളനത്തിൽ അറിയിച്ചു.
ആലപ്പുഴ മെഡിക്കൽ കോളേജിൽ നടന്ന ചടങ്ങിലാണ് മന്ത്രിയുടെ നിർണായക പ്രഖ്യാപനം ഉണ്ടായത്. ആശുപത്രികളിൽ വിതരണം ചെയ്യുന്ന ഭക്ഷണത്തിന്റെ ഗുണനിലവാരം ഉറപ്പുവരുത്താനും കൃത്യമായ ഏകോപനം കൊണ്ടുവരാനുമാണ് ഈ നീക്കമെന്നാണ് ഔദ്യോഗിക വിശദീകരണം.
എന്നാൽ, നിലവിൽ സർക്കാർ ആശുപത്രികളിൽ ഡിവൈഎഫ്ഐ (DYFI) ഉൾപ്പെടെയുള്ള സംഘടനകൾ നടത്തുന്ന പൊതിച്ചോറ് വിതരണത്തെ ലക്ഷ്യം വെച്ചുള്ളതാണ് പുതിയ നീക്കമെന്ന രാഷ്ട്രീയ വ്യാഖ്യാനങ്ങളും ഇതോടെ സജീവമായിട്ടുണ്ട്.
ആശുപത്രികളിലെ പൊതിച്ചോറ് വിതരണവുമായി ബന്ധപ്പെട്ട് മുൻ മന്ത്രി ജി. സുധാകരൻ കഴിഞ്ഞ ദിവസം നടത്തിയ വിമർശനങ്ങൾക്ക് പിന്നാലെയാണ് മന്ത്രി കെ. മുരളീധരന്റെ പുതിയ പ്രഖ്യാപനം എന്നതും ശ്രദ്ധേയമാണ്.
ജി. സുധാകരൻ പിന്നീട് തന്റെ പ്രസ്താവന തിരുത്തി രംഗത്തുവന്നിരുന്നെങ്കിലും, വിഷയത്തിൽ ആരോഗ്യവകുപ്പ് കർശന നടപടികളിലേക്ക് നീങ്ങുകയാണെന്ന സൂചനയാണ് മന്ത്രിയുടെ വാക്കുകൾ നൽകുന്നത്. വരും ദിവസങ്ങളിൽ ഈ വിഷയത്തിൽ വലിയ രാഷ്ട്രീയ ചർച്ചകൾക്ക് സാധ്യതയുണ്ടെന്നാണ് വിലയിരുത്തൽ.
